O le faafetai ua momoli e le faalapotopotoga o Teugatupe a le Atunuu le UTOS i le kamupani o telefoni feaveai a le BlueSky Samoa ona o le aofia atu ai i le tufatufaga o le tupe faasili a lea kamupani i le vaiaso ua tuanai atu.
O le faalapotopotoga lenei a le aufai iunite o le UTOS ua iai sui ua fai sea atu i le BlueSky Samoa ma o le faaiuga o tausaga faaletupe taitasi talu ona faavae lea teugatupe faapitoa a le atunuu, ua ave ai lava le lagolago lea a le UTOS i le atinae o le BlueSky Samoa.
O le tupe faasili atoa a le BlueSky Samoa i le tausaga e 2013 e pei ona faamae‘a ia Tesema, e $4 miliona (tala Samoa). O le kuata o lea seleni, ua ave i le au fai sea a le UTOS ma e $1 miliona tala le tau aofai o lea tupe ua faamatuu atu i le au fai sea a le faaputugatupe a le atunuu.
O le faatolu lea ona maua o seleni a le UTOS i tupe faasili a le kamupani lenei o le BlueSky Samoa.
O le tausaga e 2012 sa iai ni faaletonu e pei ona ta‘ua e Toleafoa Douglas Creevey o le alii pule o le BlueSky i Samoa. O lea na leai ai se tupe faasili e faasafua atu i ana au fai sea.
E ui o lea ua tele le suiga i le tulaga o le tupe maua i le tausaga na tea nei lea la ua vaaia ai le tupe faasili atoa lea e $4miliona (tala Samoa). O le faamatalaga a le alii pule e iai isi au fai sea a le kamupani ua faapea ona ave le tupe o totoe i le Komiti faatonu mo le faasafua atu i ai.
O le faafetai foi a le kamupani telefoni o le lagolago ua vaaia i le atunuu lautele ua faapea ona fai telefoni i le BlueSky ma e ui i le maualuga o faiga faatauvaga i telefoni feaveai i Samoa, a ua molimauina le faatuputupulaia o le numera o i latou ua faapea ona faaaogā lenei auaunaga.
O le faafetai a le tamaitai ia Sa‘u Justina Sa‘u o le UTOS, o le maua o lenei faamanuiaga ma o le a maualuga ai lava ma tau o sea a le BlueSky Samoa i totonu o le UTOS e pei ona iai le siisii o le tau o le iunite e totogi e le tagata mo lea kamupani.
Na ia ta‘ua o le a vaevae lelei le miliona tala lenei i le au fai sea o loo i totonu o lenei kamupani i lalo o le vaavaaiga a le UTOS. Ua ia faafetaia foi le tulaga alualu i luma o taumafaiga a le kamupani telefoni e pei ona vaaia i le tupe faasili ua maua nei.
