O le vaiaso talu ai na potopoto ai aiga ma uo a le afioga Leaupepe Matautu auā le faamanatuina o le fitusefulu tausaga o le soifua o lenei tamalii. I vaitaimi o talavou ma faipele o ia i le suafa ia Mo‘o Felavai o se alii agavaa tele ma na avea lava foi ma siamupini o lana aupaga o le middleweight e lē gata i Samoa ae faapea i taaloga a le Pasefika ma le Oceania.
O le 1968 i taaloga a le Oceania na faia i Papua Niu Kini na pine auro ai Leaupepe mo Samoa ma e lē faagaloina. “E ta le vii o Samoa ma sisi le fu‘a a le atunuu i lea aso ae ulufale atu loa se faifeau EFKS ma lona faletua na galulue i le isi motu o Papua e tusa ma le vaiaso o sau le vaa e tuli mai la‘u fusuaga, o se lagona faamomoiloto ma faagalogata.”
O le vaitau foi lea i le iloga o nisi alo iloga o Samoa i la latou aupaga ia Tony Latulipe, Laavasa Sagala, William White. Na malaga i Niu Sila Leaupepe i le ogatotonu o le 1970 ma faaauau ai lana faipele ae lei siitia mai Sini i le 1988, lea na feiloai ai loa ma lona faletua le Afioga ia Tuala Vitoria.
O nai o la alo tamaitai ia Suzie, Serah ma Victoria faapea le tina ia Tuala, na faafoeina tapenaga o le aso fanau mataina o lo latou tamā. Na amata i se sauniga puupuu sa faafoeina lea e le uso ia Ps Visita Amosa Felavai na auai atu ma lona faletua ia Vaetofaga.
O le susuga foi i le faifeau Ps Visita le uso o le afioga Leaupepe na siamupini foi i Samoa i le taaloga lava lenei o le faipele lea e toafā lenei auso sa siamupini uma ia latou aupaga.
Na mae‘a loa le sauniga, faamanuia le keke o le aso soifua o le tamā, ma amata loa le taumafataga mamafa. Sa vaaia le toatele o fanau o fanau a lenei tamā e ui e lei faatasi mai nisi o loo i isi setete.
Na momoli foi lana faafetai tele i le mamalu o le aofia na aofaga potopoto atu ma sa tali fuaitau ai foi le susuga Sasalu Frost e molimoli le faafetai a le valaaulia i le po matagofie.
E ui o le atoa o le fitusefulu o lenei tamalii ae peitai o loo malosi pea e tauavae ona tiute faalelotu i la latou Ekalesia Katoliko, o nisi o mafutaga e pei o le afioaga o Fasitoouta i Sini nei, faatamā o le Asosi Tusitala a Samoa i Sini aemaise le faatamā o le FM89.3 i Aso Lua taitasi.
