Faapaiaina le aiga o Less ma Stevee Tapelu

O le Aso Toonai na tuanai atu na aofia potopoto ai aiga na lua uo ma aumea mamae, aemaise o le auvalaaulia, e patipatia ma molimauina le Aso tele sa taupoina, ma saili tatalo ai e lē gata ia i laua, ae o nai o la aiga.
O le susuga ia Less o le alo o Hahety ma Lupeuluiva Tapelu mai afioaga o Vaivase Uta ma Vaiusu, a o le tamaitai faaipoipo lalelei ia Stevee o le alo o Steven ma Areta Tupatu o Niu Sila, ae ua loa tausaga o soifua i Ausetalia.
O le sauniga na osia ai la la feagaiga ma sulu ai a la mama, na faia i le malu o le Our Ladys Church i le pitonuu o Graigieburn, sosoo ai ma le taumafataga ma faafiafiaga na faia i le La Mirage i Somerton, lea na silasila ma maimoa ai le ulugalii fou i valevale alofa o nai o la tauaiga ma uo, e ala i faafiafiaga ma faamanuiaga aemaise o pesega mālie na saunia mo lo la aso tele.
O le DJ o le musika na faaiila ai le taleni a DJ Kalua, o le susuga ia Lawrence Fuaivaa mai le aai o Sydney, ua lauiloa e le mamlu o le atunuu ona o lona agavaa i le faafiafiaina o le atunuu mo aso tetele faapenei (MC) lea foi na mataina lona tu ai i le foe mo le fofogaina o le aso o Less ma Stevee. E toatele nisi o aiga na lua na taupeau mai isi setete ma atunuu i fafo e molimauina faatasi le aso tele, sii a‘e le viiga ma le faaneetaga ia Ieova ona o mea sili ua ia faia mo Less ma Stevee aemaise o aiga na lua.
All the best for the future Less and Stevee, love from your parents, families brothers n sisters, and all your friends.