Tuufaatasia Geoff & Whitley Hunt i le faaipoipoga

O le tau gaga ifo o le la i le tauafiafi o le Aso Toonai, aso 5 o Oketopa na tuufaatasia ai i le faaipoipoga le susuga ia Geoff Sive Hunt ma lana manamea le tamaitai ia Whitley Salafaia Matile Leofa.
O tuaa o le alii faaipoipo o le tamā ia Sive Pio & le tina ia Miriama Peseta Hunt mai Faga i Siufaga i Savaii. O mātua o le tamaitai faaipoipo o le tamā ia Joe Leofa mai Letogo ma Fagaloa faapea le tina ia Imeleta Sia Chan Tung Leofa mai Fugalei ma Leauvaa, lea foi o loo lauiloa i le la tautua e ala i taumafa (Sia’s Take Away).
Sa faia lava le faapaiaga i le maota o le tamaitai faaipoipo faatasi ai ma le taumafataga sa saunia lava e le Sia’s Take Away. O le susuga ia Sofeni Junior Leofa sa fai ma Fofoga o le aso, o ia foi o le uncle o le tamaitai faaipoipo.
O se tasi lenei o faaipoipoga e uigaese le matagofie auā sa faia lava i le auala faigofie, na o aiga ma uo. Sa faatumulia i aiga ma uo auā na mae‘a le taumafataga ona alo lea  i faafiafiaga i lea lava afiafi. Ia manuia le aiga fou Geoff ma Whitley Hunt!