Na faatumulia se tasi o malumalu tapuai i Corburg i aiga, uo ma e masani i le molimauina o le aso fiafia, o le susuga i le aoao o Joseph Junior Sinclair ma lana manamea ia Ateria Ann Tanuvasa.
O le a le galo le Aso Toonai, aso 28 o Aperila 2012, lea na tuufaatasia ai i laua i le sauniga o le faaipoipoga.
O le alii faaipoipo a Joseph o le alo o le susuga i le faafeagaiga ua lagomau mai tiasa le folauga (Rev Joseph Sinclair) ma le faletua ia Marina Sinclair.
O le tamaitai faaipoipo o le alo ia Asera Tanuvasa o Nofoalii ma le tina ia Amio Tanuvasa o Papa Sataua ma Falealupo i le motu tele i Salafai.
O le faafeagaiga o le ekalesia lava a Ateria pastor Uiga Uiga na feagai ma le taitaiina o le sauniga, peitai ina ua faia foi se faamanuiaga na filifilia ai le susuga ia Snr Pastor Apouani Unasa na te saunia se tatalo faamanuia mo le aiga fou.
O le saunoaga autu o le sauniga o se faalaeiau foi lea mo i laua aemaise aiga na lua ma le auvalaaulia na fofogaina e le taitai aoao i le lalolagi a le Ekalesia Full Gospel Pentecostal Pastor Daniel Vaeao na malaga mamao mai i Amerika Samoa ona o le faamoemoe. Na mae‘a le sauniga lotu ona faalele foi lea o lupe ma agai atu ai i le taumafataga i le faleaiga o le Food Star i Reservoir.
Matagofie taumafa o le aso, ae na faafiafia ai foi ma nisi o alo o le atunuu i musika faaleagaga le Unasa Brother.
O le fofoga o le aso o le uncle o le tamaitai faaipoipo le susuga ia Luki Purcell. Na faagasolo fuafuaga e ala i faafiafiaga a autalavou aemaise aiga na lua i le talisapaia o le la faamoemoe.
O le molimau mo Joseph na saunia lava e lona tina Maria Sinclair mai le afioaga o Papauta ma Apia, faapea foi Ateria na saunia lava e lona tina ia Amio Tanuvasa.
Mae‘a lena ona alo lea i faaaloaloga o le aso o le tamā ia Misa Tagaloa na feagai ma ia tulaga.
Tofutofusia foi le nofo a faafeagaiga na iai ma faaaloaloaga masani, na tasi moemoe Pule ma Tumua i le afiogaia Saveamaalii Viliamu, na te molimoli se faafetai aua ua fata luga fata lalo i faaaloaloga o le aso.
Na sologa lelei mea uma ma usuina faatasi ai “Lota Nuu” ma toe foi ai le viiga o le Atua i le tatalo faaiu na saunia e le susuga i le faafeagaiga, Pastor Alapati Atoa. Manuia le ulugalii fou.
