E tele ni avanoa taua o loo ofoina mai e ono faamama avega ma toomaga i ai o tatou tagata mo le agai i luma, e le gata i le fanau, a o le aiga atoa ma tagata lautele.
O le vaiaso na tuanai atu sa faailoa atu nisi o polokalame o loo ofoina mai i ekalesia, ma faalapotopotoga poo mafutaga a tagata lautele, i le faatinoina lea o polokalame e faaaogaina ai le gagana muamua (Samoa), e faaleleia ai le faitautusi ma le tusitusi a le fanau i totonu o aoga. O loo faasalalauina nei foi ni sikolasipi a le Ofisa o Aoga, e faapitoa mo alo ma fanau o loo i le Tausaga 8 i le tausaga nei 2012, e mafai ona talosaga ai mo le sauni atu mo le Tausaga 9 i le tausaga fou (2013).
O lenei polokalame na amataina i le tausaga e 2010, e faaagaga mo aiga e maualalo le tupe maua, ae manaomia le fia auina atu o fanau i aoga tumaoti (Private school).
E tusa ma le 250 le aofai o tamaiti o loo mauaina nei faamanuiaga, talu ona amata lenei polokalame. Ua toe faasalalauina nei le isi 50 avanoa, mo fanau o loo sauni atu i le Tausaga 9 i le tausaga fou, 2013.
E tusa ma le $15,000 e ofoina i le tausaga e tasi mo le totogiina o le pili, mo tausaga uma e auai i le aoga maualuga. E aofia ai foi ma le alauni e $1,500, e maua i tausaga taitasi, mo meaaoga ma nisi alagaoa e manaomia mo le aoga.
E le aofia ai i lenei sikolasipi le totogi o le nofo tumau, poo le auai i nisi aoga sei vagana ai aoga tumaoti.
O nisi o vaega e tagai i ai mo le filifilia o i latou e talafeagai i ai nei sikolasipi:
• O se tagatanuu o Niu Sila
• O le tupe maua a le aiga e $56,000 pe i lalo ifo
• E leai nisi alagatupe maua
• E le sili atu i le $200,000 ni mea totino
O nai faamatalaga ia e faailoa atu ai nei alagamanuia mo le fanau, ae maua le tele o faamatalaga taua, faapea foi ma le pepa talosaga, pe afai e fesootai atu le Ofisa o Aoga i le:
Aspire Scholarship – Telefoni: 04 463 0923 fax: 09 463 8252
Upega tafailagi: aspire.scholarship@minedu.govt.nz
Tele lenei faamama avega mo tatou aua se lumanai manuia o alo ma fanau mo a taeao. E leai lava se afaina o le taumafai e talosaga mo nei avanoa. Afai lava e le faamanuiaina, ae ua taumafai atu i ai.
E le sau faalua se avanoa, e tasi lava le taimi e oo mai ai, afai la tatou te le faaaogaina, e le mafai ona toe maua mai. Manatua foi fai mai le upu: ‘E le faatali lava le taimi ma le tai i se tagata.’
Ua tatou iai nei i lenei seneturi ua faigata le soifuaga i soo se vaega, ma ua faigata foi ona maua ni avanoa mo le agai i luma. Ua tatau ai ona tatou mataala ma mata‘itu avanoa tatou te maua.
Manuia tele le sauni atu mo tiute ma faiva o le vaiaso fou.
