Ua mae‘a nei ona faapaiaina le ‘olo faatasi ai ma aposetolo e toalua i le pitonuu ua ta‘ua o Inala, lea sa malaga aloaia mai ai le taitai o le Puleaga Aoao mai Samoa a le Divine Mercy, Aposetolo Alesana Alalatoa. O Sio Anae ma Otemai Tenisio, o i laua nei ua faapaiaina e avea ma aposetolo.
O le aso 26 o Aperila sa amata faatuina ai lea lālā, ma ua alagatatau i le taimi nei ona faavaeina ma faapaiaina e pei ona atofaina ai le Aso Sa aso 15 o Aukuso 2010.
O le mamalu o lea sauniga faapitoa, ona sa faatumulia i nisi mai isi tovine tapuai sa molimauina ma faatumulia ai le malumalu o le Palisi St Mark i Inala.
Sa taitaia lava e le aposetolo ia Alesana Alalatoa polokalame uma o lea aso tāua, se‘i vaganā ai le faapaiaina o le sauniga, sa taitaia lava e le Afioga ia Patele Epati Tamati, o le puleaga lava a Kuniselani.
Sa lagiina lava viiga o le Atua e le aufaipese siufofoga malie, i lalo o le taitaiga a le Taitai pese ia Pisa Iulio ma le faipese, Sio Anae faapea tapiano, Manoa Kolio ma Tasinilo Alefosio e sau mai le Divine Mercy i Melepone.
Mo le silafia, o se uluai ‘olo lea ua faapaiaina e le Aposetolo ia Alesana i Brisbane ma ua avea foi o le ‘Olo tutotonu o lenei Setete, e ogatotonugalemu i ai nisi lālā o le a agai mai i le lumanai.
O le tāua o lea mafutaga ona e faagaioi a latou fono tatalo i po o Aso Gafua taitasi, faapea asiasiga i nai tagata o mafatia i gasegase faapitoa foi mo alo ma fanau ma tina ma tamā matutua.
Sa iai nisi mai isi palisi sa molimoli le agaga alofa e ala i meaalofa auā le galuega amata a le Divine Mercy poo le ‘Olo i Inala. Sa maualuga le faaaloalo, ma sa fai lava ma fofoga o le aso le afioga i le aposetolo ia Alesana Alalatoa i taimi o le taumafataga.
O le ofisa la ua filifilia mo lea ‘Olo fou, o le Taitai o Rosalie Fernandez, Sui Taitai o Ana Otemai, Failautusi o Nila Ilalio, ma le teutupe ia Polesi Tui. Ua iai le faamoemoe o le a toe taliu atu le aposetolo i Samoa i le Aso Toonai o le vaiaso nei.
