O lagona o le fia auauna pea ma tautuaina le mamalu o Samoa atoa ai ma uo Pasefika, o le mafuaaga lava lea e tasi o loo tulitulimatai pea e lenei foi vaega fou ua tulai mai mo le faatutuina o latou sui mo le Aai Tele o Aukilani.
O le agai atu pea mo le faafeiloaia o faiga faapolokiki mo le sailia o ni sui tauva, a o ni sui foi e fetaui lelei ma agava mo galuega faafaufautua ma sui o tagata lautele i totonu o le pulega tele a Aukilani, ua lē mafai ai ona toe solomuli le ABC, ae ua manaomia le tu loa i luga ma savali.
O le ABC, e faamatalaina o le A Better Choice, o se vaega tumaoti muamua lenei a le Pasefika ua faatutuina ni o latou sui mo Aukilani i Saute auā le faigapalota mo le Super City e pei ona agai mai.
O loo agai le silasila ma le faamoemoe o le ABC mo le faatumauina pea o le lelei mo le aai i Aukilani i Saute.
O le toe faaleleia o faalapotopotoga taitasi a atunuu uma o le Pasefika atoa ai ma isi atunuu eseese o loo i totonu o le lio o le aai, o loo matuā faamamafaina i le anavatau a lenei vaega.
O loo latou matuā lagolagoina foi le faatumauina o le ulufale saoloto e lē totogia o vaitaele ma nofoaga faapea, atoa ai foi ma faletusi uma i totonu o le aai, o isi ia o vaega o loo faamuamua ma finauina e le ABC.
E lē gata i lea, ae faapea foi ona lagolagoina malosi le tulaga o pisinisi ma galuega o loo faatinoina le tautuaina ai tagata lautele o le itumalo, o isi ia itu malolosi o loo finauina e le vaega lava lenei.
O loo iai lava le faamoemoe maualuga o le ABC, o le a lagolagoina o latou sui faatutu e le toatele o tagata o le itumalo, mo le manuia lautele e ala i mataupu o loo ave i ai le latou faamuamua.
E tusa ai ma se pepa o faamatalga sa tuuina mai, aemaise ai sa faapea foi ona toe faamaonia mai e le sui sinia o le ABC, le afioga ia Tofilau Esther Lakisa-Taito, sa ia ta‘ua ai le faanaunauga ma le faamoemoe o le vaega e pei ona sauni i ai mo le faigapalota.
Sa ia ta‘ua ai foi le faamoemoe e pei ona sauni i ai le ABC mo le faalauiloaina aloaia o le taumafaiga i le Aso Toonai aso 21 o Aukuso.
O lea aso e lē gata i le faalauiloaina atili o le vaega, ae o le a sailia ai foi ma sina seleni, e faagasolo ai ana galuega faatino, aemaise o le fesoasoani mo ona sui tauva.
