E sili lava Ieova, e tatau foi ona matuā viia o ia i le aai a lo tatou Atua, o lona mauga paia. (3) E iloa lava le Atua i ona maota, e fai o ia ma ‘olo maualuga…( Salamo 48:1 & 3).
O le mae‘a ai ona fausia o le ‘Olo poo le mauga o le Atua e faasino i le ekalesia AOG ua igoa nei i le “Victory Church” i le aai o Bellbird Park, o se isi lea laasaga fou i tagata lotu ma le auaunaga i le Atua. E lē faaitiitia ona faafoi ai le faamanū ma le faaneetaga i le Atua o Ia o le Tupu o Tupu ma Alii o Alii!
O le Aso Toonai, 18 o Ianuari, na atofaina e faapaia ai le malumalu tapuai o le Ekalesia Victory Church, o loo tausia e le susuga ia Ps Faavae ma le faletua ia Whanaganui Avia o ni lupe faalele mai Salelologa i Savaii.
Na faatauina le fanua ua iai nei le falesa i le tausaga e 2003 i le tau e $350,000.00, ae faamae‘aina ona totogi i le 2005, i taimi o le nofoaiga a le susuga ia Ps Faalolo ma le faletua ia Phillipa Kurene a o iai matafale e 60 a le aulotu.
Ina ua malaga Ps Kurene mo Samoa, e tusa ma le $57,000.00 se seleni a le ekalesia na teuina mai lea taimi, ae tauaveina loa ma faaauau mai e le susuga ia Ps Faavae Avia ae ua tulai mai foi le teuoloa ia Martin Scanlon.
Na talanoaina e le ekalesia ua tatau loa ona sefe se seleni e fau ai se falesa auā ua mautu le fanua. E $370,000.00 le seleni na maua i totonu o le tolu tausaga, ma amata ai loa le galuega ia Aukuso 2012, na o sefuluai lava sa leai nisi sailiga seleni na faia.
O le tau atoa o le galuega a le ekalesia e tusa ma le $950,000.00. E maoa‘e foi le tetele o loto o le ekalesia pe a faatusa i se tupe atoa na o latou mauaina ma faaaluina i le galuega atoa e tusa ma le $605,000.00.
E na o le $350,000.00 se tinoitupe na nonō mai le Bank e faaauau ai le fausiaina o le Ala o le Atua. E 5 masina sa loulouā le tau ma poloka ai le galuega, o le ala lea na fai ai sina umi o fauina le malumalu mai le 2012 seia oo mai i le masina lenei o Ianuari 2014.
O le tatalaina o lea galuega tele ma faapaiaina le malumalu i le Aso Toonai, na matuai faatumulia i le tele o faafeagaiga, tauaiga, uo ma ē masani, nisi o taitai ma sui mai mafutaga ma faalapotopotoga, aemaise i latou sa lolotu ai muamua lea lava na maua taimi e toe faatasi atu ai e molimauina le aso faapitoa.
Na ootiina le lipine e Mayor Paul Pisasale o le itumalo o Ipswich faapea foi ona auai Cr Paul Tully.
Na tauaaoina le ki e le agaiotupu ia Tupai Mau Moananu ae tatalaina faitotoa e le susuga i le faafeagaiga ia Ps Faavae Avia ma ulufale loa i totonu le faalapotopotoga.
