Tauva tamaitai Samoa tofi faipule o Redcliffe mo Palemene faasetete a Kuiniselani

O le avanoa ai o le tofi faipule o le itumalo o Redcliffe mo le Palemene faasetete a Kuiniselani, o lea ua alo atu ai le tamaitai Samoa, le faletua ia Talosaga Ta‘ialataua Matafeo Kepaoa McMahon e fia tamoe mo le tofi faipule, ma o le Aso Gafua, 20 Ianuari lea na tatala aloaia ai ana faatosina.

Ua avanoa lenei nofoa sa tauave mai e le alii o Scott Dricoll (LNP) o se sui sa faamavae mai ia Novema 2013. Na faamavae lenei sui faipule ina ua maua e le State Parliament Ethics Committee ni moliaga e uiga i ana soligatulafono i tulaga tau tupe i le taimi o le faatosina ma le mae‘a ai o faatosina, lea ua laki le faamavae ae semanu lava e faamalolo e le Palemene.

E momoli le agaga faafetai i le tamaitai poo le faletua ia Talosaga Ta‘ialataua Nunu Matafeo Kepaoa McMahon, ona o le a‘e o se tofā e fia tamoe mo le tofi (Tutoatasi Independent Community candidate) i le itumalo o Redcliffe, o le Setete o Kuiniselani e aofia ai Kipparing, Clorntars, Scarborough, Margate, Woody Point ma Redcliffe.

O lona tina o Liualevaiosina Sauoalii mai Fasitootai ma Vailuutai, a o lona tamā o Ta‘ialataua Nunu Matafeo Kepaoa mai Asaga i Savaii. Ua faaipoipo atu o ia i le CEO o le Moreton Bay Community Legal Service, le susuga Laurence McMahon, ma e toatolu o la alo.

Na manumalo le faletua ia Talosaga i le Moreton Bay Regional Council’s Australia Day cultural award i le 2011 mo lana galuega i le  Polynesian and Indigenous communities i le itumalo o Redcliffe.

I ni tusitusiga ua tuuina atu faalauaitele e le tamaitai o Talosaga a o feagai ma ana faatosina, e faapea o le agaga moni ua ia tamoe ai mo le tofi ua avanoa, auā o lona loto atoa e fia galue ma fesoasoani mo tagata lautele auā le manuia o le community, sa galue foi i le community mo le 5 tausaga.

Ua ia malamalama lelei i faafitauli i totonu o le community. E lē gata i lea ae ua ia lagonaina foi o lona valaauina mai le Atua.
Sa galue i le Redcliffe Neighbourhood Centre e avatu fesoasoani mo lo tatou atunuu. E $151,331.44 se vaega tupe mai le latou ofisa na alu i le faipule ua faamavae ina ua ia tulai mai i le tofi faipule.

E toaono sui taufetuli. O le sui a le ALP, sui a le LNP, sui a le Green Party ma latou e  toatolu tutoatasi e aofia ai ma Talosaga McMahon.
O le Aso Toonai, 22 Fepuari o le aso lea o le faiga palota auā le toe filifiliina o se sui  faipule o Redcliffe e fai ma o latou fofoga i le Palemene a Kuiniselani. Mo nisi faamatalaga faafesootai mai Talosaga i le Mobile: 0457-510-846; Imeli: tmcmahon@docex.com.au.

Talosaga McMahon