O le Aso Toonai na tuanai atu aso iva o Novema, na feofoa‘i ai a la tautoga i luma o le Atua, luma o le afioga Patele, aemaise o luma o le tapuaiga a o la aiga, uo ma aumeamamae, na aofia potopoto e molimauina lo la aso tele.
Na osiina a la tautoga i le malumalu o le Ekalesia Katoliko (St Paul Apostle) i le pitonuu o Endeavor Hills. Na mae‘a le sauniga o le faapaiaga, ona sosoo ai lea ma le taumafataga, ma faagasolo ai tulaga masani o aso tetele faapenei.
O le Fofoga o le aso o le susuga a Matu Seiuli, o se tasi o tulaga sa mataina o le aso tele, o molimau o o la soifuaga mai o la mātua aemaise o a la uosili, ae lē gata i lea o viiviiga o lo la lalelei uigaese na vaaia i lo la aso.
A o alo i le taliina o le sua, na faagasolo ai ma faafiafiaga o valevale alofa mai aiga na lua mai Ueligitone, Aukilani faapea ma Melepone.
Na faamae‘a le aso matagofie ma le manaia naua i le molimoliina o le agaga faafetai o aiga na lua e le afioga ia Vaifale Muliaga mo Samoa na potopoto, ma tatala ai le fili alii ma le mama ua lomi ma le vaa ua goto i faaaloaloga ua maualuga. Manuia le ulugalii fou!
