E ui ina tulimatai tupulaga talavou e fia malaga tafafao a o lei laasia le olaga faatagata matua, aemaise le feilafi mai o tafaoga a teine ma tama, peitai e lē o le agaga lea o nisi o alo ma fanau e pipii loto ma alofa moni i mātua.
Na toe tolopo le faigamalaga a le tamaitai o Gabrielle Catherine Schmidt e pei ona fuafua mamao mai, i le fia malaga i Isaraelu pe a atoa lona 21 tausaga, ona o lona naunau alofa i nai ona mātua o loo taitaia le Ekalesia Voice of Christ i Brisbane, o loo tau faamae‘a foi le malu o le Atua o le aulotu.
O le po o le Aso Toonai, aso 9 o Novema sa faatumulia ai le nofoaga masani i Waterford West e lē gata i aiga, uo ma ē masani, ae faapea foi le aufaigaluega totofi a le Atua, i le molimauina lea o le faamanatuina o le 21 tausaga o le tamaitai o Gabrielle Katherine.
Na vaaia le loifofoga maligi o nisi i le saunoaga logomālie a le tamaitai e faapea, o lenei taumafataga na atofaina mo le faamanatuina o lona aso fanau, ma o teutusi uma e foaia e le auvalaaulia o le a ofoina atu o sana meaalofa mo le malu o le Atua o loo fausiaina, e iai lava taimi e tafao ai pe a faamuamua le Atua.
O le tamaitai o Gabrielle o le alo o le Toeaina taitai o le Ekalesia Voice of Christ, le susuga ia Ps Andrew Schmidt mai Alamagoto & Safotu faapea le faletua ia Lagi Schmidt mai Saina i Faleata & Afega.
O le Toeaina Taitai o le Ekalesia AOG itu Palagi, susuga ia Ps Alaivanu na ia siitia mea i Matautu Sa ona alo lea i le faamoemoe. O le tamaitai o Gabriel e galue faavaitaimi i le Telstar ma aoaoina lona faailoga Diploma of Business Administration & IT i le Logan Campus. E tele faafeagaiga ma faletua sa auai. O Fofoga o le po, o le tofa ia Tapusoa Chanel Schmidt ma Matthew Pulu.
O le susuga lava ia Ps Andrew-Schmidt ma le grandfather o le tamaitai fai aso fanau le tamā ia Taliaoa Sione sa feagai ma faaaloaloga auā le paia i le auvalaaulia.
Na faia foi le faatau paia a Tumua ma Pule ma tasi moemoe ai i le tofa ia Poulava Sam Matautia, sa fai ma sui o le valaaulia e momoli se agaga faafetai ona o le maualuluga o faaaloaloga aemaise le taumafataga na saunia lava e aiga ga lua.
Manuia lou aso soifua Gabrielle alofaaga auina atu i ou aiga uma faapea lau ekalesia Voice of Christ faasilisili mai ou mātua, uso ma tuagane ma auaiga uma i Samoa, Niu Sila ma Ausetalia.
