Ua leva ona moe miti le alii mai Toga ia vave maia le aso e tuufaatasia ai ma lana manamea poo le tamaitai ua ia filifilia e avea ma ana tautoga. Na osia i le Aso Toonai lea sauniga paia o le sakalameta o le faaipoipoga le alii Toga o Sione Tapaevalu ma le tamaitai o Taumaoe Iosefa ‘Oti, o ona mātua o Faafofola ma Tunumafono Iosefa Oti mai Sataoa ma Satapuala.
Sa taitaia lava le sauniga e le susuga ile toeaina ia Rev Tauaaga Mataafa o le toeaina taitai o le pulega EFKS a Saute o ia foi le faifeau a le tamaitai faaipoipo. Sa matuai fau ma soloi le taumafa aemaise le faamalieina o le auvalaaulia i le maualuluga o faaaloaloga na faliu ma faafaō i ai aiga ga lua.
O le fofoga o le aso o le afioga ia Muagututi’a Lilomaiava ae o faaaloaloga sa faaleoina ma faatautaia e Apulu Iliolemalae Asovao Kilipati. Sa fai ma sui o le ekalesia le afioga ia Mataafa Samuelu Mataafa e faafetai aiga na lua.
O le taumafataga sa tapenaina lava e le Uncle Sams take aways, le tofa ia Poulava Sam ma Lona Matautia.
