A umusa se galuega tele sa fai, ona faapea lea o saunoaga a susuga i faafeagaiga, Afai e lē atinae e Ieova le fale e galulue fua i latou o e atinae, a lē leoleoina e Ieova le aai e mataala fua i latou o ē leoleoina.
O upu ia a le faisalamo o Tavita na toe osia ai le taulaga o le faafetai ma le viiga i le Atua e le Ekalesia EFKS Savali o le Filemu i Mangere Bridge, ina ua mae‘a le maota o le faafeagaiga faatasi ai ma le maota o loo faaaogā e le matagaluega.
O le aoauli o le Aso Toonai 14 o Fepuari na patipatia ai e le Ekalesia lea galuega fou ma ua avea nei ma aseta poo meatotino a le Ekalesia. Na auai uma matafale e 29 faatasi ai ma uo ma aiga na valaaulia e molimauina lea faamoemoe, ae lē gata i lea o le sui o le kamupani faatau fale na faatau mai ai lea aseta.
O le susuga lava i le faafeagaiga ia Rev Tone Leituala na taitaia le sauniga. Na amata lava i le ootiina o le lipine o le pa, lea sa nafa ma se tasi o tamā matua o le ekalesia le afioga ia Laulu Peo, ae o le ootiina o le lipine o le maota o le faafeagaiga sa faatautaia e se tasi o toe Ulutaia o le galuega, le tina ia Faava Tuigamala, ae o le lipine o le maota o le matagaluega na ooti e se tasi foi o tina matua o le ekalesia ia Pitone Taaalo.
O le tatalo i le taimi o le sauniga, na saunoa i ai le aoao mai Malua ia Filemoni Tuigamala i le faafetai. O le faatoesega na fofogaina e le tiakono ia Fualemoni Levu ma le tatalo o le manaoga na saunia e le aao tusitusi o le ekalesia ia Tuiloma Tuigamala.
Na vaaia loimata o le fiafia i lea aso auā ua tali le Atua i le tautiga sa gapatia ai i le tele o aso ma tausaga, ua galo foi le vaivai ma le tigaina ina ua tu mai le galuega i lona tulaga matagofie. Na taualuga le faamoemoe i le taligasua, e fiafia ai uma tagata sa auai, ma faaiu ai loa i faaaloaloga, lea sa tutootoo ai Maatafa Pasese Salu e fai ma fofoga o le ekalesia i lea foi vaega o le galuega.
Na saunoa le fofoga o le ekalesia ia Tuiloma Tuigamala, e 29 matafale o loo iai i le taimi nei, e 24 matafale o loo galulue ma le 5 o loo fesoasoani. O le aso 23 o Ianuari na latou taulimaina ai le ki o le fale mai le kamupani, ma latou galulue ai loa mo le toe faaleleia i le tolu vaiaso.
O nisi lava o tamafanau o le ekalesia o loo iai le tomai ma le taleni na latou toe lipeaina le fale atoa, o le tofa ia Laifai Hyne, susuga ia Soma Faletolu, ma le tiakono ia Manuavai‘a Siaosi faatasi ai ma le fesoasoani a le susuga ia Aleni.
O le taumafaiga o lenei galuega e lua tausaga na latou saili seleni ai mo le manaoga, i se aseta a le ekalesia, na faatau a latou ticket faatasi ai ma po siva. O le tau aofai o lenei galuega atoa e $5,75000.00, ma o se fiafiaga sili i le susuga i le faafeagaiga ia Rev Tone Leituala ma le faletua ia Aoao Leituala ma le matagaluega ua maua se aseta a le ekalesia e faaaogā i sauniga ma mea e fai o le lotu, ma e lagona o le a tele foi se seleni o le a sefe mai ai i le hall o loo latou faaaogāina i aso sa taitasi i sauniga le Nga Tapuvae.
