O le autalavou, o se tasi lea poutu malosi i totonu i soo se ekalesia, auā o loo tele ina faafofoa mai ai olaga o fanau auā le lumanai manuia o le galuega a le Atua. O le tele foi o polokalame faatino i totonu o soo se galuega faalelotu, o tupulaga talavou lava, auā o i latou o le malosiaga o le galuega.
O le afiafi o le Aso Faraile, 13 o Fepuari na tumutumu ai se tasi o hall i totonu o le taulaga faatau o Magele, i aiga, o uo asiasi e molimau galuega amata a le autalavou a le Ekalesia o le Samoan Christian Church i le pitonuu lea o Magele.
E lua vaega na vaevaeina i ai le autalavou, o Alefa o loo taitai ai le susuga ia Mikaele Fatuaau ae faamalumalu ai le tina o le galuega ia Rasela Ah Wong, a o Omeka o loo taitai ai le susuga ia Aukuso Muliaga ae faufautua ai le tamā o le galuega ia Pastor Tafua Maseafa Pua Ah Wong.
O le taitai o le autalavou ia Ioane Tafelesolo o ia lea sa fai ma fofoga o le po mo le faagasoloina o le polokamale, e vaavaalua ma lona faletua ia Leata Tafelesolo. O lenei faamoemoe sa fai faatauvaga, ona o le naunautaiga lava o le susuga i le faafeagaiga ma le faletua ia iai se finafinau o fanau talavou aemaise o le lagolago a mātua e sailiili ma sogasogā e suesue ni auala e faamalosia ai pea le galueaga a le Atua.
Ma e tolu ni vaega na togi agai i ai lenei tauvaga, o le pese faitaga, togiga ma le pese savali, e ese mai ai i le au e maualuga le taulaga faapea ana uo asiasi aemaise o taaloga.
O le susuga i le faafeagaiga ia Gafatasi Mauola Lilomaiava ma le faletua ia Leaia Lilomaiava sa faamasinoina lenei tauvaga. O le iuga na oo i ai lenei faamoemoe, na sili aoao ai le ‘au a Alefa i le taulaga, o uo asiasi, togiga faapea le pese faitaga, ae o Omeka na manumalo i le pese savali ma le talita o taaloga.
O se mafutaga fiafia tele i tagata uma, e lē gata i aiga lotu a o uo foi na asia lea polokalame, ma na taualuga le mafutaga o le po i le taumafataga na saunia lava e le ekalesia. O le sini autu lava o lenei faamoemoe ia malosi le lagolago a mātua i fanau ina ia malolosi o latou olaga i le Alii ma maua nisi agaga mo le malo o le Atua.
