Faauta la‘u manamea e, la‘u uo ua e lalelei oe, amuia se ua na maua se avāa amio lelei, o valevale alofa ia o le tusitala poto mo mafutaga, poo fea lava foi e saili ma maua ai le alofa moni, o ina e ao ona taula ai le soifua ma amata fofoa ai aiga manuia.
Pe eseese tu ma aga i fanua aemaise o atunuu na soifua ane ai, peitai o le alofa e leai sona tuaoi, o le molimau lea na maitauina i le Aso faapitoa o le alii Samoa o Feata ma le tamaitai Initia o Farren.
O le alii faaipoipo o le alo o Luai Toni ma Evelina Tuimauga, o le Ekalesia Katoliko i St Alban na faapaia ai lo la aiga, ma osia ai a la tautoga faamaoni. Mae‘a lea sosoo ai ma le taumafataga i le Luxary Reception i le pitonuu o Melton.
E toatele tauaiga o le tama faaipoipo na malaga mai Samoa ma Niu Sila aemaise o isi setete o Ausetalia, ma na tofu sao uma foi i faafiafiaga matagofie o le aso, lea na fetufaa‘i ma faafiafiaga faa-Initia mai le aiga o le tamaitai faaipoipo.
Maitauina le matagofie ma le mālie o fiafiaga ma pese a lea foi atunuu na fofogaina e le faili, ae na lei tuu māmāina foi e tama o le Manu aemaise o pesepesega faa-Samoa.
Na galulue faatasi aiga na lua mo le fofoga taumafa aemaise o le mamalu o le valaaulia ona o pelega lava o fanau, mae‘a ma ta‘ape fiafia ma faamanuiaga mo le ulugalii fou.
