O le afiafi o le Aso Sa na faatumulia ai le maota o Whitlam Centre i Liverpool auā le sauniga lotu o le Sisigafu‘a o lenei tausaga i Sini, Ausetalia.
O le sauniga lotu o le 2014 na tapenaina e le Ekalesia aoao a Faalapotopotoga a le Atua lea ua oo i ai le faasologa. O le upu faafeiloai na saunia e le susuga ia Ps Komisi Lealamisa (AOG) faapea le tatalo amata.
O viiga lava na saunia e le ekalesia, sosoo ai ma le faitauga o le Tusi Paia e Ps Tau Loli ma le talosaga na fofogaina e Ps Tito Fepuleai ma ao ai ma le taulaga.
O le faamanuiaga o le taulaga na tataloina e Ps Faitoaga Soloi ae taualuga le sauniga i le lauga a Ps Onosemo Pulepule lea sa ia faatusaina ai le Malo o le Atua i se malo e lē faaumatia ae manuia ma o le manulauti foi lea o le tagavai o le Malo Tutoatasi o Samoa e faavae i le Atua.
O le mae‘a o le tatalo faaiu na saunoa ai loa le afioga i le Konesula o Samoa i Sini, Tofa Manogiamanu Fonoti Etuale Ioane e fai ma sui o le Malo o Samoa i le faamanatuina o le limasefululua (52) tausaga o lo tatou malo tutoatasi.
Na ia faafetai foi i le paia ma le mamalu o le atunuu na sasao atu e faamanatu faatasi le aso faapitoa o Samoa ma tomanatu ai i le fita ma le gaoā o le ala na asaina e tuaa mo se lumanai saoloto o Samoa mai pulega faakolone.
Sa sosoo ai ma faafiafiaga faaleagaga mai autalavou a ekalesia Katoliko, Aso Fitu o le Toe Afio Mai, AOG ae taualuga ai e le tatalo faaiu a Ps Onesemo Pulepule ma agai atu ai loa i se taumafataga māmā na saunia e le Fono Aoao a tagata Samoa i Sini faapea La‘u Samoa.
Na talisua faatasi le mamalu o le atunuu ma le aufaigaluega a o faagasolo faaaloaloga masani faaleaganuu a o lei ta‘ape le fuamanusina.
O le Aso Toonai nei, 7 o Iuni o le a faia ai le siva tele (Independence Ball) i Liverpool lea e faafiafia ai le Exodus faatasi ma Toala Eteru Toala (Evaeva) ae taualuga i aso o faafiafiaga, pese, ma faleaiga lea ua atofa mo le Aso Gafua 9 o Iuni 2014 e faia lava i le Whitlam Centre.
