“Talu ai ole moliaga faaopoopo ua aumai e leoleo e matuiā ma maualuga le faasalaga, ole a tuu atu ai ou moliaga uma e fofogaina ile Faamasinoga Maualuga”…Faamasino
Ua fā nei moliaga a leoleo faasaga ile Peresetene o Faamasinoga o Fanua ma Suafa le afioga Fepuleai Attila Ropati, ma ole moliaga fou ole faaoo o manu’a tuga ise tagata o lona faasalaga e sefulu tausaga ile falepuipui. Ole mafuaaga lea ole faia ole faaiuga ale tamaitai Faamasino le afioga Alalatoa Rosella Papalii e ave moliaga ole Peresetene e suesueina i luma ole Faamasinoga Maualuga, ona e lē oo le malosi ole faamasinoga faaitumalo ile moliaga fou ua tuuina atu e leoleo. O isi moliaga e tolu o Fepuleai ole faaoolima, faaoo manu’a ma le umia ose ose atigi fagu.
Ole Aso Lua na tea nei na valaau ai moliaga ole Peresetene mo le taimi muamua lea na talia ai le valaau ile ta ole 9 ile taeao ae lē ole sefulu e valaau uma ai isi mataupu.
Na talia le talosaga ale Peresetene ma lana loia e valaau moliaga ile taimi lea ina ia alofia ai le tumutumu atu o tusitala ma le aufaasalalau, peitai na maua e tusitala le taimi e valaau ai ina ua logo iai e nisi na latou silafia muamua lea faaiuga.
E lei tuuina atu se tali a Fepuleai ona ole a tulai ile faamasinoga maualuga ile aso 26 ole masina nei lava poo le Aso Gafua ole vaiaso asau.
Ole pati faaiu ole tausaga ua mavae a alii ma tamaitai faamasino na faaalia e leoleo na tupu ai le solitulafono ua molia ai le Peresetene. Ole leoleo po ale ofisa o faamasinoga e faapea na inu ai ile fiafia na toatamai ai le Peresetene ma ia taina ai le ulu ise atigi fagu pia peitai e tele isi faamatalaga oloo ta’ua ai ose atigi fagu uaina ae faatoa iloa tonu le ituaiga o fagu na faaaogā ile faaoolima pe a valaau ni molimau a leoleo.
Oloo ta’ua e ni molimau faatuatuaina e lei faailoaina e le leoleopo i lo latou aiga lona manu’a ma le mea na tupu. Peitai ole tuanai o ni aso talu ona tupu le faaoolima na faalogoina ai e le leoleopo ua tiga lona ulu ma agai ai loa ma lona afafine ile falema’i.
Ole taimi foi lea na faato’a iloa ai e le aiga ole leoleopo le mea na tupu ma agai ai loa le aiga ma le leoleopo ua faaulu le latou tagi i leoleo.
Na mae’a le valaauga o moliaga ole Peresetene ile faamasinoga faaitumalo ona ui atu lea i totonu ole ofisa e lei afio mai i fafo ole faitotoa ole potu faamasino, ona sa tumutumu i fafo le au pueata o televise ma nusipepa.
