Ole Trust poo le Faalapotopotoga lenei, ua oo atu ile 144 i latou ua faamauina ma lesitala o latou suafa talu mai le 2011. Ua maitauina e lē na’o alii na tipoti mai, ae oloo iai ma tamaitai e toafā ua lesitala e le ofisa lea mo tagata faafoi mai i Samoa.
O lona uiga e iai nisi tagata na faafoi mai i luma atu ole 2011, e lē o maua o latou faamaumauga.
E toaono na faafoi mai ile vaiaso talu ai mai Amerika, ma oloo faagasolo ai nei fatalanoaga ile vaiaso nei ile faletalimalo ole Taumeasina Resort. Ua o i tua io latou aiga, ae e iai foi potu faavaitaimi ile fale ole Ofisa ole Trust, e mafai ona nonofo ai sui nei, pe afai e iai ni faafitauli poo ni feeseeseaiga i totonu o aiga, e iai avanoa e faamautu ai mo se taimi.
I faamaumauga, e lē itiiti ni aafiaga o nei fanau, ole tele o fanau nei e lē o lelei foi le latou tautatala ile gagana Samoa, ma e lē o mautu foi se sootaga ma o latou aiga.
E lagona foi le faaesea o latou, sosoo atu ai ma le faigata tele ona mafai ona maua ni latou galuega. Ona ole va ma tagata, ae o ofisa ma kamupani. Talu ai aafiaga o nei tagata ile tulafono, e iai le popolega i o tatou tagata ma le faaeteete, e faigata ai ona maua ni a latou galuega.
Talu mai le 2011 e silia ma le 50 tusi na faaulu ile malo ma isi ofisa ae na’o le tasi pe lua tagata na manuia. Ae ole tele o latou oloo saili avanoa pea.
A maua avanoa nei e faigaluega ai ole a faamāmā avega foi i o latou aiga, ma maua ai se tupe e ola ai latou. Ole ki ole faigaluega, e tausi ai aiga, ma faaitiitia ai le ono toe foi e soli le tulafono, pe afai e tuai ona maua se galuega. Ole tāua lena ole vave maua o avanoa e faigaluega ai nei tagata.
O nisi o i latou nei e omai Amerika, ma le toatele lava na tipoti mai Niu Sila. E tusa lava pe faapea na tatala i tua ile silia ile sefulu tausaga talu ai, ae ole tulafono lea a Amerika, ua toe faafoi mai ai nei tagatānuu o Samoa.
Ole faalapotopotoga lea poo le TRUST ua faaaogā iai fale ole malo i Nafanua. Na faatuina lea ofisa ona ole gaoiga ole faletupe ole WESPAC i Vaitele, ona o nisi o tamaiti na aafia ile gaoiga ole faletupe, o tagata faapea na toe faafoi mai i Samoa.
Ua galulue faatasi le pulega ole TRUST ma le ofisa ole Loia Sili, ile faatupeina ole galuega i tupe faameaalofa, mai Niu Sila ma Ausetalia.
O fesoasoani ia e aofia ai tupe mai Ausetalia ma Niu Sila, e faatupe ai polokalame.
Ua maitauina e tele i tamaitai oloo faia nei polokalame, ole faaitiitia o faiga faasolitulafono, peitai ose tasi lea o auala e fai ai se sao o alii, e pei foi ona faauu mai ai nisi oi latou mai a’oa’oga sa faia ile faaitiitia o soligatulafono.
E tele lava ni aafiaga o nei tagata ua toe faafoi mai i Samoa, mai le sootaga ma tagata iinei, aemaise ai ole faasalalau atu o latou ata ma o latou talaaga faasolitulafono a’o nonofo ai i totonu o Niu Sila ma Amerika.
Ole tele o nei tamaiti na o atu i fafo a’o laiti ma o latou mātua, mo so latou lumanai manuia i fafo. Ae ole toe foi mai i Samoa, ua silia ma le 20 tausaga talu ona o ese ma Samoa, e lē o tele foi se tulaga ole agaifanua o latou iloa.
O tagata uma nei, oi latou oni tama fanau a tagatānuu o Samoa, ua mafai ai ona agavaa e toe faafoi mai i Samoa. O vaega uma ia, e manaomia mo le faatagaina e toe foi mai i Samoa, e aofia ai ma le talaaga o ana soligatulafono. Ile faataliga oi latou nei ile vaiaso talu ai ile malaevalele, na iai leoleo, ofisa ole tiute, leoleo faapitoa transnational crime unit, faato’a oo ane ai ile TRUST, mo le faamauina o latou faamoemoega ile lumanai.
Ose tulaga mataina tele ile taunuu mai o nei tagata, ae ua tapena atu e le malo auala e faafaigofie ai ona sosoo o latou olaga ma aiga.
Ma sa molimauna foi le iai o latou tauaiga ile malaevaalele ile taimi na taunuu ai.
Ole Susuga Faafetai Toria, oloo gafa ma le faia lea o sootaga ma aiga, a’oa’o ma faamasani, ole taumafai lea e talanoa ma o latou aiga.
E lē o iloa tonu ile taimi nei, pe na iai se polokalame mo nei tagata a’o lei tipoti maia i Samoa.
Ole tasi o polokalame lata mai mo latou nei, e aofia ai le Silafia o au aiātatau, auā ole a faaauau ai lava le faafoi mai o tagatānuu Samoa e solitulafono i Amerika, Niu Sila, Ausetalia ma isi atunuu.
Ole mata’u pe fefe e faigaluega ile siosiomaga o tagata sa solitulafono, lea na talanoa ai Faafetai, e manaomia ai lava le tagata e iai lagona mo nei tagata.
Auā oi latou nei, ua tusiesea mai fafo (written off), e manaomia lava foi le lagolago ale Trust ma le tagata e vaai ile laveaina mai o nei tagatānuu.
E toatolu alii ua faigaluega ai nei ile ofisa ole TRUST, e aofia ai ma tagata galulue fua, ae o tagata foi na tipoti mai fafo.
