E lua moliaga sa faasaga ia te i laua na molia ma sa la ioeina le moliaga e tasi o le faaoolima lea ua mae‘a ona fai i ai le faasalaga a le Faamasinoga i le aso 21 o Aperila o le tausaga nei.
O le moliaga lona lua o le faaleaga o meatotino lea na la teena i le avanoa muamua lea faatoa la toe ioeina i luma o le Faamasinoga Faaitumalo i le aso 29 o Me 2015.
O i laua ua molia o Charles Tavita e 31 tausaga o se tane o Lotopa ma Vailima faatasi ai ma le alii o Francisco Kingson Uhrle e 40 tausaga o Lotopa ma Samatau.
O lē na aafia o Cruise Robert o Lotopa ma o ia o se tagata o loo nofomau i Niu Sila. E tusa ai ma le ripoti a le itu a leoleo o loo ta‘ua e faapea o le mataupu lenei na tulai mai i le aso 17 o Aperila 2015 i le itula e 5 i le afiafi. Sa agai atu lē na aafia i lona aiga i Lotopa ae taofi ai lana taavale e i laua ua molia.
Sa faia ai loa ei laua se faaoolima i lē na aafia ma faaleaga le sā poo le taavale a lē na tagi lea na faaleagaina uma ai salutimu o le taavale. Sa maua le avanoa e sola ese mai ai lē na tagi ma vave ai ona mae‘a lea mataupu.
O i laua uma ua molia o loo faamauina e iai moliaga na molia muamua ai i le Faamasinoga. O le alii o Charles o loo tuli lona faasalaga i le falepuipui i isi moliaga e fā, ae o Francisco e ono masina o loo nofo vaavaaia i lona moliaga o le faaoolima.
Na saunoa le Afioga i le Alii Faamasino le afioga Fepuleai Amperosa Roma, o loo ta‘ua i le ripoti a le ofisa faanofo vaavaaia sa faia se faatalatalanoaga ma lē na tagi ae ta‘ua ai e lei iai se faamaulaloga ua tuuina atu e i laua ua molia.
E $400 le tino i tupe na faaalu a lē na aafia i le toe faaleleia o lona sā. O le faaiuga o le Faamasinoga ua tuuina atu ia te i laua e 12 masina e nofo vaavaaia ai.
