Na sousou le sami ma galu malolosi faapea matagi, ae na alofagia e le Matai Sili le folauga a le Gaualofa ma lona auvaa na kapeteni e le tamaitai Samoa o Fealofani Bruun, lea na toe taunuu manuia i Samoa i le afiafi o le Aso Faraile na tea nei.
Na faamatala le tamaitai kapeteni i le faigata o le olaga i luga o le sami pe a lē galulue faatasi tagata uma e ausia le faamoemoe o le toe faaolatia mai i Samoa.
Fai mai le kapeteni o lana tala lea na ave i le auvaa a o lei tuua Aukilani i Niu Sila, ia aveese le manatu o le tagata i lona mamalu ma lona tulaga, poo ia foi o se matai tāua, auā e lē tāua lea i le olaga o le tagata folau.
O le mea tāua o le tutū faatasi, auā a oo mai loa taimi e louloua ai le tau a o i luga o le vasa, e lē faamamaluina lava poo ai le matai tāua, o ai le tagata e suli mai i se aiga Tupu poo se aiga e tele ‘oa ma le tamaoaiga auā a tausisi e tausi le mamalu lea, ae afatia ma fano ai ola i le vasa ua lē taunuu le faamoemoe o le taunuu i se atunuu ma le manuia.
O le faamatalaga a le kapeteni na mafua ina ua fesiligia i le tuai taunuu o le latou vaa folau, ona sa fuafua o le 12 o le Aso Faraile 5 o Iuni 2015 e taunuu ai i le matafaga oneone uliuli i Vaisigano o loo lumafale i ai le faletalimalo o Aggie Grey peitai na toe tuua i le 12 i le aoauli ae na faatoa taunuu i le lima i le afiafi o le aso lava lea.
“O le matagi e faamoemoe i ai le malaga, ma sa faaletonu le matagi ma o nisi taimi ua to‘a le pogai lena na lē maua ai le taimi fuafuaina”. O le vaa folau o Samoa o le Gaualofa e lē o le taimi muamua lea ua tuua ai le atunuu mo ni folauga.
E pei ona silafia o le tausaga e 2012 ao tapena le atunuu i le 50 tausaga o lona tutoatasi, sa auai i se folauga a vaa folau uma o atunuu Polenisia lea sa latou momoli se feau o le puipuia malu o le siosiomaga i atunuu Europa.
Na taunuu manuia lea folauga ma toe foi mai i Samoa faatasi ai ma isi vaaa folau. O lea na toe malaga i Niu Sila mo le faia o nisi o galuega e faaleleia ai le Gaualofa ma o le toe taliu mai na afea ai le Atu Kuki mo se tasi o polokalame taua, ma o le mae‘a ai o lea fuafuaga na faatutū mai ai loa le folauga a le Gaualofa i Samoa.
O lona auvaa sa api uma i Aukilani a o faia galuega faaleleia i nisi o le mamalu o le atunuu ua avea nei ma sui o le aiga folau o Samoa lea o le avea ai le afioga i le Ao o le Malo ma faatamā. O nisi o sui o le auvaa e mai atunuu e pei o Tonga ma Fiti ma le Atu Kuki.
