E lē ‘asa se amataga o se tausaga fou ma ni faalavelave e tutupu e oso ai lagona o le faanoanoa.
O lenei tausaga fou ua amatalia o nisi o soifua ua fano ona o faalavelave e mafua i fiafia o le kilisimasi ma le Tausaga Fou ae o nisi foi ua maliliu ona o faalavelave e pei ose taalega i le sami i Luatuanuu ua fano ai ola oni alii talavou se toalua.
I le amataga o le tausaga ua sauni fanau mo le toe a’e o a’oga o se faanoaoaga i matua ma fanau aemaise faia’oga o le A’oga tulagalua a Vailoa Faleata ona o le po o le Aso Lua le aso muamua o le 2019 a malama le Aso Lulu 2 o Ianuari 2019, ae fafagu nisi o aiga e tuaoi ma le falea’oga i le malama pupula o le afi na aafia ai le falea’oga.
Sa na’o le tutu ma silasila atu o nisi sa latou muamua i le faalavelave ma misi alofa ma tuu fesilisili pe na susunu ese tasi poo ni tagata le falea’oga pe o se faaletonu ini uaea eletise. O le tali o ia mau fesili o loo agai iai suesuega a leoleo ma o loo iai masalosaloga o se mu na faatupu e se isi.
Ua alu mafaufauga i lea tulaga ona e iai lipoti ua ta’ua ai na gaoia ni meatotino a le a’oga e pei ose pusa’aisa ae sosoo loa ma le mu. E iai se fogafale lua e faafeasagai tonu ma le falea’oga sa tuufua ae ua tutu nei ua faaleagaina ona sa aafia foi ise mu. O loo iai foi masalosaloga na faatupu e se tagata poo ni tagata lea faalavelave ae oo mai i le taimi nei e le o mafai ona maua mai se faamatalaga i leoleo ma le vaega o le fuimu poo ua maua le mafuaaga o lea mu na tupu ini tausaga e lei mamao atu. O loo iai pea vaaiga o lea fale palagi fogafale lua na aafia i le afi.
O loo sailia nei e le komiti a le A’oga tulagalua a Vailoa Faleata se fesoasoani ini fale e a’e iai fanau pe a toe amatalia a’oa’oga o le amataga o le tausaga. O le hall a le a’oga o loo faasaoina faapea le ofisa mo galuega a le pule ma faia’oga faapea se isi fale peitai na faaalia e se molimau faatuatuaina e le mafai ona ofi uma ai fanau i fale o loo faasaoina.
“Na pau le tulaga e ono oo iai se faaiuga o le tapunia o le a’oga ae faamautu lelei se nofoaga e faaaoga e fanau.
O le falea’oga autu ua faaleagaina na toe umusa lona toe faafouga i le tausaga ua mavae. Na faaalia e se sui o le komiti o le tulaga faanoanoa lea ona sa saili seleni matua ma le komiti ma faia ai le galuega, a’o lea ua tupu ai le faaletonu.
