Ua avea nei le afioga i le Ao Mamalu o le Malo ma Ao filifilia o le Iunivesite Aoao a Samoa, ina ua mae’a se faaiuga a le Kapeneta na faia i le masina o Oketopa o le tausaga ua mavae. Ua sui tulaga le afioga i le Ao o le Malo i le afioga A’eau Chris Hazelman, sa seei i le tofiga mo ni tausaga.
O le faauuga a le a’oga o matata eseese a le Iunivesite aoao a le atunuu na faia i le masina ua tuanai atu nei le masina mulimuli o le tausaga 2018, na faaee ai ma le tofiga Ao o le iunivesite i le afioga i le Ao o le Malo afioga Tuimalealiifano Vaaleto’a Sualauvi II. I le amatalia o le Iunivesite. Ua toatolu i le afioga i le Tui Aana Ao o le Malo ua filifilia i le tofiga lea sa muai filifilia iai le afioga i le Tapaau Faasisina Susuga Malietoa Tanumafili II, sosoo ai ma le afioga Tupua Tamasese Efi a’o avea ma Ao o le Malo.
I le malelega a le Ao fou o le Iunivesite na ia timai ai i fanau a le atunuu i le tāua o le ola a’oa’oina. Sa ia faafetaia foi le galuega o feagai ma faia’oga o le Iunivesite ona e lē faigofie. O lana faafetai foi i le Malo ma le Fono Faatonu o le Iunivesite aoao a Samoa ona o le faaaloalo maualuga ua filifilia ai o ia e tauaveina le tofiga.
O le faauuga mulimuli a le Iunivesite o lena tausaga ua mavae e lata i le faselau le aufaauu o alii ma tamaitai, na maua ai tusipasi ma faailoga maualuluga i le mae’a o a’oa’oga i matata eseese e pei o le kamuta ma le faufale, o galuega tau inisinia o le soo uamea, faapea tomai i galuega tau tagata tafafao, pisinisi, faapea galuega tau fesootaiga, o le faasalalau ma galuega faatusitala mo tautua a leitio, televise, o nusipepa ma upega tafailagi faapea fesootaiga televavave faaonapo nei.
O se tasi lea o vaega o a’oa’oga i matata eseese ua tuufaatasia i lalo o le pulega o le Iunivesite aoao a le atunuu i le tuanai o tausaga sa eseese ai pulega lea sa faaigoa ai o le Polytechnic. O alo ma fanau a le atunuu ua faaiuina le taumafai ma maua faailoga ma tusipasi o le a agai e saili ni galuega, a’o nisi foi ua faauu sa galulue i nisi o matagaluega a le Malo ma pisinisi tuma’oti ae o lea ua toe saga faalautele lo latou a’oa’oina i matata eseese o loo tautua ai.
