“Na ou faailoa i le faamasino aiaiga o le faavae e afaina ai a‘u aiā tatau i le sailiga o le amiotonu”…Levaopolo Talatonu
O le faamasinoga o le afioga i le alii faipule o le Palemene le tofa Levaopolo Talatonu, ua faalima nei ona tolopo ma ua atugalu ma popole ai le faipule i le afaina ai ma ona aiā tatau i le sailiga o le amiotonu.
O le valaauga i le vaiaso na tea nei na talia ai le talosaga a le itu a leoleo ma le matagaluega o tupe maua ia fofoga faatasi moliaga o Levaopolo ma le tamaitai o Christine Ainuu o loo molia i solitulafono e fesootai ma le aumai i Samoa o se pusaoloa poo se container na aumai ai se uta e limaselau ma ona tupu katuni o fagu uisiki (whiskey).
O le kamupani vaa la‘u uta faamomoli a le faipule e faigaluega ai le tamaitai o Christine. O le mafuaaga lea o le talosaga e fofoga faatasi o la moliaga ona o molimau lava e faaaogā ia Levaopolo e faapena foi mo lea tamaitai.
O le finagalo o le faipule ina ua maua se fesootaiga i le telefoni, na ia faailoa ai lona faanoanoa tele i le tuai o gaioiga a leoleo e ana moliaga faasaga i le tamaitai faigaluega ma le matagaluega o tupe maua e ana moliaga o loo tuua‘ia ai Levaopolo.
O lona faanoanoa ona o le toso ai o le mataupu ma ono aafia ai ona aiā tatau e saili ai le amiotonu ona e lē o iai se loia o tulai mo ia ae o loo ia finauina lava lona mamā atoatoa mai moliaga a le matagaluega o tupe maua i lalo o le tulafono a le ofisa o le tiute.
“Sa ou talosaga i le faamasinoga e faaleaogā o‘u moliaga ona e lē o mautonu leoleo ma le ofisa o tupe maua ae ua leva ona ou sauni i le faamasinoga”, o lana saunoaga mai lea. E lei talia e le faamasinoga lana talosaga ae ua taatia se‘i toe silasila i ai le faamasinoga i le masina o Novema lea ua tolopo i ai.
O loo tatalo le alii faipule talosia ae oo atu i le masina ua tolo i ai le mataupu ua saunia uma vaega a le itu a leoleo ma le matagaluega o tupe maua ma faatino loa le valaauina o molimau.
“Ua matuā afaina lava a‘u fuafuaga i lo‘u tofi faipule, o loo faatali foi lo‘u itumalo poo le ā le taunuuga o nei moliaga, ae o loo tolo pea le faamasinoga”, o le isi lea finagalo o Levaopolo.
O loo tetee le faipule i moliaga e valu o le suia o faamaumauga, ma le faia o ni faiga tau faasese i faamaumauga. O ni moliaga foi faapea o loo molia ai le tamaitai faigaluega o lana kamupani o le Island Freight, o loo tuua‘ia i le aumaia o le pusaoloa o fagu uisiki e leai se pemita e faataga ai ona aumai ni avamalosi i le atunuu.
E lei maua mai se faamatalaga mai leoleo pe ua maua le alii faipisinisi e ana le pusaoloa lea e faapea ua malaga i fafo e lei toe foi i Samoa e tali moliaga.
