Toatele tamaitai o loo fia tauva i le tauvaga Tausala o Samoa
E toatele alo tamaitai talavou o le atunuu i Samoa ua lolofi e fia lesitala i le tauvaga e sailia ai se lalelei poo se Tausala o Samoa mo lenei tausaga. Faaalia e se sui o le komiti o le tauvaga o se tulaga lelei lea i le agai pea i luma o le tauvaga ina ia maua ai ni tamaitai agavaa e avea ma Tausala o le atunuu i tausaga taitasi.
Peitai ua lagona e se sui o le komiti o le tauvaga o le Tausala o Samoa le faanoanoa i se faaiuga a le komiti o le Tausala Samoa Niu Sila, ua latou faalauaitele e faapea o le a lē tauva lo latou Tausala na manumalo talu ai nei i le tauvaga tele o le a sailia ai se Tausala o Samoa i le vaiaso o le Teuila o lenei tausaga 2011.
Faaalia e se ofisa sinia o le pulega o tagata tafafao i Samoa le susuga Dwayne Bentley, ua oo atu i le taitaifono ma le komiti le faaiuga a le komiti a le Tausala Samoa Niu Sila.
Sa lē manuia sailiga i se finagalo o le Pule Sili o le Pulega o le Samoa Tourism Authority poo le taitaifono e tusa o lea faaiuga.
Na pau le faamatalaga ua oo mai i se molimau, o loo sauni le Tausala Samoa mai Ausetalia e malaga i Samoa e auai i le sailiga o se Tausala o Samoa, lea e taualuga i ai polokalame o le vaiaso o le Teuila.
Na faamaonia mai e le susuga Dwayne Bentley le auai o le tausala Samoa mai Ausetalia.
O le faasalalauga faalauaitele mai le komiti o le Tausala Samoa Niu Sila o loo faaalia ai le auai o lana Tausala i le tauvaga i le lagolagoina o le faamoemoe, ae o le a lē tauva. Ua mafua le faaiuga ona e faapea mai le komiti, e lē talafeagai i se Tausala na manumalo i se tauvaga aoao faalemalo poo le national competition, ona toe tauva i se tauvaga faalotoifale ua na o tamaitai Samoa e tauva ai.
E foliga mai i lea vaega o le faaiuga e au ina faato‘ā tauva le Tausala Samoa o Niu Sila i le tauvaga tele o le Pasefika lea e sailia ai se lalelei o atunuu.
Peitai e lei maua mai se faamatalaga e tusa o se tulaga faapea, ona sa faatino muamua i nisi o tausaga ua mavae, le auai o Tausala Samoa mai Hawaii, Niu Sila ma Ausetalia i tauvaga tausala o le Pasefika, ae na toe taofi ina ua aliali nisi o faaseā mai isi atunuu e na o le taitasi o latou sui tauva.
O le faaiuga o le vaiaso lenei e faalauiloa mai ai e le pulega o tagata Tafafao le lisi o tamaitai o le a auai i le sailiga o se tausala o Samoa i le vaiaso o le Teuila. Faaalia e Dwayne Bentley e lē i lalo ifo o le to‘a sefulu tamaitai ua faaulu atu suafa e fia auai i le tauvaga.
“O le taimi nei o loo iloilo faamatalaga uma o tamaitai ua faailoa atu le fia auai ona faato‘ā mafai ai lea ona faailoa o latou suafa ma le aofaiga o i latou o le a sailia ai se Tausala o le atunuu.
E pei ona silafia, o le tamaitai e manumalo o le a fai ma sui o Samoa i le tauvaga e sailia ai se Tausala o le Pasefika, lea o loo iai se manaoga mai Amerika Samoa e talimalo ai i le tausaga nei.
