E faatalofa atu foi i lenei vaiaso i le paia ma le mamalu o Samoa i ona tulaga faalupe. Faafeiloai atu i susuga i faafeagaiga ma o latou faletua, o tupu ma tamalii, le vasega i faleupolu, o faletua ma tausi ma le malosi o le nuu.
O le vaiaso na tea nei na amata ai ona tatou talatalanoa i le mataupu e faatatau i le totogiina o le faifeau, poo le faaoloaina o le auauna a le Atua.
Na ou ta‘ua i lea vaiaso le eseese o auala o loo faaaogāina e ekalesia ina ia tuuina atu ai se meaalofa i le auauna a le Atua pe faaupuina foi, e totogiina ai le faifeau pe leai.
AE o le fesili tele e tulai mai e faapea, “e tatau ea ona fai se totogi o le faifeau pe leai?”
Ua tatou iloaina uma lava e tatau ona faia se foai, poo se meaalofa mo le faifeau. O le ā le auala e mafai ai ona faatinoina lea tulaga?
O le auala lona fā na ou ta‘ua ua fai lea ma manatu o nisi ma o se manatu taatele lea ua iai nei, ma o se finagalo e faapea, O nisi o ekalesia e manatu o le valaauina o le faifeau ma lona aiga o se valaauina mai i le Atua ina ia ola mativa lana auauna. I se isi faaupuga e iai le manatu e lē tatau ona lelei le tamaoaiga o le faifeau ae tatau ona ola mativa, o inā e iloa ai o ia moni lava o le tagata o le Atua.
O se manatu faavalevalea lea tulaga se‘i tulou. Afai e lelei ia te oe le taumafa lelei ma mautu lou aiga, e faapena foi le faifeau ma lona aiga.
Manatua foi o le uluai ekalesia a le faifeau o lona aiga ae lē o le ekalesia. Se‘i o tatou silasila loloto i lea lagona.
Afai o le finagalo o le faifeau ma lona faletua ina ia ola mativa, o la laua filifiliga lava lea ma o se tulaga e tatau ona faaaloalogia.
Peitai e ao ona faia e le ekalesia le mea e tonu ma le finagalo o le Atua. Se‘i o tatou vaavaai i itu nei e lua. Muamua o le ekalesia e faatamala i le faaoloaina o le auauna a le Atua.
Ona tatou matamata ai lea i le ekalesia ua soona tausi le faifeau i le tulaga e ono matanana ai le faifeau se‘i tulou lava. Ma ua soona fai le alofa o le faifeau ae o loo āfaina le aiga o le ekalesia.
O lona uiga e moomia le poto ma le faautauta i vaega uma aemaise le faasoaina o le seleni ma le faaoloaina o le auauna a le Atua. Mo le ekalesia o loo faatamala i le vaaia o le faifeau.
Muamua: O le tala a le Aposetolo o Paulo e faapea “Aua ne‘i e fusifusi i le gutu o le povi ao solisolia e ia le saito, i le ma lea, e tatau ona avatu i le faigaluega lona taui.” (1 Timoteo 5:18).
O loo faailoa mai e Paulo i lenei fasi fuaiupu se lagona e faapea “E fia ai foi le povi latou ia.
O loo galue le povi e fai lana galuega ae a lē fafagaina ua pe le povi.”
I nisi o fuaiupu o loo ta‘ua e Paulo ia Timoteo le tāua o le fafagaina o le auauna a le Atua i le galuega o loo ia faia.
O loo galue le faifeau mo le manuia faaleagaga o le ekalesia, o lea e ao ai foi ona galulue malosi le ekalesia mo le manuia i la le tino o le faifeau.
O lo‘u talitonuga o le toatele o faifeau e finagalo ina ia galulue i totonu o le ekalesia, peitai ane ona o le lē lava o le tupe maua mai i le ekalesia e mafua ai ona toe saili e le faifeau se isi ana galuega ina ia mafai ai ona lava le faasoa mo ia ma lana fanau.
A tele le taimi o le faifeau e faaalu i totonu o le lotoifale o le ekalesia, o le a faapea foi ona telē se lelei e tupu mai ai.
O se manatu ae lē fai ai; e tatau ona fai lelei se tupe maua poo le totogi maua e tuuina atu i le faifeau i vaiaso taitasi, aua ne‘i taumateina, o le mea lava ua maua o le mea lena.
O lo‘u manatu o le lē alofa lea i le faifeau ma lona aiga.
AE lei oo lou finagalo i le aofaiga o le tupe e tatau ona totogi ai le faifeau, o le fesili e tatau ona fesiligia ai i tatou uma aemaise lava taitai o le ekalesia ma i latou o le a fuafuaina pe fia se tupe e tuuina atu i le faifeau.
O se taiala lelei lenei mo oe ma le aiga.
1. Aua ne‘i faagalueina le faifeau ina ia ola i le faatuatua pe afai e lē mafai ona e ola i le faatuatua.
O le uiga o lea faamatalaga, a lē mafai ona e ola i se peleti i le vaiaso poo le mautu o le tupe maua, e lē tatau foi la ona e manatu e tatau i le faifeau ona ola faapea.
E tatau ona totogi le faifeau e talafeagai ma le tupe o loo e mauaina.
O se isi auala e tatau ona faaaogāina e fua i ai, o le silasila lea i le tupe o loo mauaina e tagata o le ekalesia poo le aulotu.
E iai lava tagata i totonu o le ekalesia e iai o latou manatu faapea, o le faifeau e fou mai e lē tatau ona telē sana tupe maua, se‘i tau fua mai ni ana galuega.
O le isi o manatu e faapea, “E lē tatau ona telē se totogi o le faifeau ona o loo lelei le totogi o lona toalua.”
O le isi manatu e faapea, “E lē toatele se fanau a le faifeau o lona uiga e lē tele ni mea na te moomia².
O le tele ia o nei manatu e ono avea ma manatu tāua e maua ai le tulaga lelei ma se faamanuiaga o le auauna a le Atua.
Ia manuia lenei vaiaso.
Lui Ponifasio