Faamuta e Fiti Bati moemitiga a le Toa Samoa

Na tau fai finau le Toa Samoa ma Fiti i lana taaloga pa‘ū ma nofo i le taeao o le Aso Gafua. E ui o le faasalaina ma lē taalo Leeson Ah Mau ae na tauave lava e Iosia Soliola ma nai tama le taumafaiga mo se avanoa i le Semifinal ma Ausetalia lea na lami ia Sikotilani.
Na mae‘a le Siva Tau ma kiki le polo ae faate‘i loa e Fiti Samoa i le minute lona tolu ma sili ai Fiti 6-0. Na sosoo ma le sala kiki ova mo ‘ai e 8-0 toe sikoa ai ma Wes Naiqama mo ‘ai e 14-0 i le malologa.
Na vaaia le amata taalo popole o le Toa ae lei aulia le ‘afa o le taaloga ma i le toe luasefulu minute uma le taaloga na osofai atu ai le laina i tua ma sikoa ai loa Antonio mo ai 14-4.
Na toe ova se sala a Fiti mo ‘ai e 16-4 ma vaovao faalua tama taaalo ina ua pue malosi e Junior Moors, Aaron Groom faapea le pue malosi a Tim Lafai ia Bukaya. Na toe sikoa Fiti  i lalo o le pou ma manumalo ai 22-4 faapea le sao atu i le Semifinal e fetaui ai ma Ausetalia.
Ua mautinoa foi le Semifinal muamua a Niu Sila ma Egelani ae peitai ua sauni atu nei Fiti e tauave le fu‘a a le Pasefika.
O Fiti na sao foi i le Ipu o le lalolagi i le 2008 lea na faia‘ina ai ia Ausetalia i ni ‘ai se tele. O lea tausaga na lē sao Samoa i le pa‘ū ma nofo talu lana faia‘ina faafuasei ia Aialani i Parramatta.
Ua taliu nei tama o le ‘au ia latou kalapu ma aiga a o talitali se ‘au o le a siamupini. O se manumalo mataina a Fiti ia Ausetalia e avea ma talafaasolopito i le liki talu ona faavae mai, talu ai o le maoae o lami ma manumalo tetele a Ausetalia i lana pulu.