Faamanuia Le Mamea Ropati i le Toa ma le Manu

Na logo i tino i le faafofoga a le paia ma le mamalu o le atunuu i Sini le faamanuiaga mo le Manu Samoa faapea le Toa Samoa e le Afioga i le Minisita o Faatoaga ma Faigafaiva,  Le Mamea Ropati, e pei ona afea ai Sini i lana malaga i Asia.

 
O luga o le alaleo FM89.3 na taumomoli ai alofaaga ma faamanuiaga a le afioga i le minisita e pei o le masani a le Malo o Samoa a o lei tuua e autaalo laufanua o Samoa mo atunuu i fafo.
Ae peitai o Sini nei lea e taaalo ma faamautu ai le toatele o tamafanau o loo i le Toa Samoa, e leai se avanoa e momoli ai foi faamanuiaga mo nei alo ma fanau o loo tausinio mo le atunuu.
Na saunoa le afioga i le Minisita, “Ia avea ia le alofa o lo tatou Matai i le lagi e faaatoatoaina le malosi ma le atamai i le Toa Samoa ma le Manu Samoa. O Samoa ua masani lava i le taalo i le loto e lē pei o atunuu maumea e tetele totogi o tama taalo.”

 
Na saunoa foi le afioga Le Mamea i le tapuaiga a si o tatou atunuu i Samoa o loo tu‘i mai le mulipapaga ma tatalo ia manuia faiva o alo ma fanau. “O loo tatalo uma si o tatou atunuu ina ia manumalo tatou, ae talosia ia manuia faiva o nai tama.”
O le pati a le feepo o loo vaaia i luga o upega tafailagi i soo se atunuu o aumau ai o tatou tagata ma a latou faamalosiau e momoli mo nai uso. O lenei faiga na amata mai lava i aso e lei ola le TV i Samoa, sosoo mai ai ma le 1991 i le Ipu faapea le fusuaga maoae a Toaletai David Tua ma Lennox Lewis i le aso 6 Novema 2000.

 
I le manumalo a le taitoafitu aoao i le 2010 na siitia ai le agaga tapuai o le atunuu i se tulaga ese talu mai le 1993 i Hong Kong. Aepeitai o le manumalo mataina a le Manu Samoa i le 2011 i le Ualapi, na vaovaogata ai loa le tapuaiga a Samoa seia oo atu i le Ipu o le lalolagi i Niu Sila.
O lea vaitau na silasila ai le lalolagi ua oo le tapuaiga a Samoa i tulaga o iai isi atunuu i le vali faasoloatoa o maota ma laoa, taavale ma foliga o tagata tapuai e lagolago ai a tatou fitafita o taaloga e oo mai lava i le taimi nei.

 
Na faaluaina lenei manatu o le Afioga i le Minisita i luga o le ea i Sini nei, e le susuga i le Faafeagaiga ia Rev Namusua Mareko o le EFKS Camden. “Ia manuia tele le alofaiva o le Toa Samoa ma le Manu Samoa i taaloga o totoe, ma ia faamanuia pea i ai le Atua.”
Afioga Le Mamea Ropati ma sui o le Tautai i Sini