I le mae‘a ai o le taaloga i le po o le Aso Toonai na te‘a nei ma fesiligia ai Sonny Bill Williams poo le ā sona finagalo i le fusu ma le All Blacks, peitai na saunoa manino le alii, e numera tasi lava le jersey auā o lana miti lava lea na ia faananau i ai o le fia ofu i le jersey a le All Blacks.
E ui ina tolu taaloga o loo tu ai ma iai le vanu o le filifiliga i le taimi nei o le lakapi liki, lakapi iuni ma le fusu, peitai na ia saunoa lava e tele lava vaega e tatau ona faaleleia. E talitonu sa leai se tasi sa lei lagona le fiafia ina ua manumalo Sonny Bill Williams e pei ona autasi ai le iuga a faamasino i lona manumalo i ‘ai i le la fusuaga ma le alii o Scott Lewis mai Sini. O se taaloga mataina sa faaiu i ai le taamilosaga i le Convention Centre i Gold Coast, ma sa faaalia le agaga faafetai o le alii o Sonny i le faaiuga a faamasino e pei ona faamauina ai latou sikoa 60-55, 60-55 ma le 60-54 e lē mamao lava se va ma lana paga e pei ona mae‘a ai i le 6 taamilosaga. O le vaaia o le lagolago a le atunuu sa lagona ai e le alii o Sonny le faagaeetia ona o le toatele o Samoa na mafai ona pa‘au atu ma molimauina lana taumafaiga. O le lauiloa ai o lenei alii agavaa ma le tomai i le lakapi ma le fusu, e pei ona maimoaina ai le isi tulaga lelei o le poto o le alii e ‘alo ma tali atu i tu‘i a le alii o Scott, sa mautinoa foi le to‘a o le alii ma le malosi e ala lea i le maitauina o lona taufaalili i lana paga, o inā tatou te mautinoa ai le lava tapena.
I le tagatagai atu foi a le atunuu na vaaia le mataalia o lana taalo i le toe taamilosaga, i le lona tolu ai lenei o ana fusuaga, 2 manumalo ae tasi le faiaina.
Ina ua mae‘a taaloga i lea afiafi, na fai ai lava ma se faatautu‘i (auction) i meafaipele a le alii o Sonny Bill, ma o le seleni na maua ai, sa ia fai meaalofa ai e fesoasoani i galuega laveai o le lologa i Brisbane.
Ia manuia lava lou sauni atu mo le taaloga o le ipu o le lalolagi i le lakapi, ma nisi au fusuaga o mulimuli mai. Faafetai foi i le tapuaiga a le atunuu i soo se tafa o le lalolagi.
