O se tulaga ma se vaega e faafiafiaina ai le agaga aemaise le tapuaiga a Samoa i soo se atunuu i le tulai mai foi o le alo mai le Tuisamau, susuga ia Alex Faatau‘i Leapai o loo numera tasi i le Heavyweight i Ausetalia.
Se mea lava ina a matagofie o le tali manao ua sosoo nei le tolu o isi taaloga a Alex o mafuta atu i ai e lē foi fua.
O le lagona lava lea o loo manomia e Alex ma alo o le atunuu i soo se faagatama, o le tapuaiga auā e soo se faiva lava e tapuaia, e mautinoa e iu manuia, e lē sili foi le ta‘i i le tapuai.
Ua see mai nei Alex i le numera 13 i le fusi o le WBO, ae ua numera 9 nei i le Commonwealth pe a fua atu i le taumafaiga ma le tulai mai foi o lenei alo o Samoa e maeu foi le finafinau ma le saili malo. E lei leva ona ofi mai Alex i lenei faagatama peitai ua iloga foi le olaola o lana taleni.
Sa iai le manatu o Alex o le a matagofie se umi o se la sipaaga ma lana paga peitai e pei ona molimauina le mafatia o si alii o Jason Barnett, na o le 2 minute 47 sekone i le taamilosaga muamua ae gigiva loa si alii mai Amerika ua lē lavā.
E faatolu ona patatū i lalo, ma na galo ia Jason ua mua ona tali ona foliga ae faatulou atu ai loa ma le tu‘i a Alex i lona itu, o inā la sa afaina tele ai si alii ma mae‘a ai loa ma le taaloga.
Na matuai masii atu se vaega o le ekalesia LMS Pasefika e tapuaia le taaloga, e lē gata i lea o nisi o fai pisinisi, Susuga ia Poulava Sam Matautia o le uncle Sam’s Catering, Leigh & Lealaifola Lui Savelino o le ABPS PTY LTD, le mamalu o Samoa faapea le tupulaga talavou ma le Penina o Asuisui 1197am.
O nisi o kamupani sa lagolagoina le susuga ia Alex o le Osmar Properties, Bris Aluminium,Madison Sports ma le Streeteers.
Sa momoli le agaga faafetai o le susuga ia Alex mo le tapuaiga mamalu a le atunuu pele, o ona aiga & uo ma ē masani ma nai tina ma tamā matutua ae faasili i ona mātua ma si ona alalafaga o Laulii.
Manuia foi lou alofaiva Alex mo le isi au taaloga o lumanai nei, e lē o mailoa pe toe fusu i Ausetalia poo Amerika.
