Faamoemoe pea i Niu Sila mo ni fomai faapitoa

O se tala fiafia lea na saunoa i ai le alii Palemia, le Susuga Tuilaepa Lupesoliai Sailele Malielegaoi i se faatalatalanoaga o le vaiaso ma tusitala i le mae‘a ai o le tatala aloaia o le falemai tele i Motootua.
O se falemai e pei ona auina atu i isi lipoti mai i Samoa, e tusa ma le $120 miliona tala Samoa lona tau atoa, e aofia ai le fale tele mo gasegase tau sāvali atoa ai potu taofia, ae ua faapea foi ona aofia ai ma potu o taotoga.
O le vaega lea o le falemai ua vaaia ai le faatotogaina uma i masini mai fafo ina ia mafai ona faatautaia i Samoa lava ia taotoga ia e masani ona avatu ai i Niu Sila gasegase e ogaoga le matuiā ma ua lē mafai ona taooto i Samoa nei.
O le mau a le alii Palemia, na agai lava e aumai masini nei ona o se faamāmā avega i le agai i luma aemaise o le tele o le tupe ua faaalu e le Malo i le taumafai lea e ave i fafo gasegase ua moomia taotoga i atunuu mamao.
O se faiga foi lea na agai ai lava le Matagaluega o le Malo i tausaga ua mavae e faatū se falemai mo le faamamāina o le toto i Samoa ona o le tele o le tupe na alu ai i lea togafitiga ma le faatuputupulaia pea o tagata Samoa ua aafia i gasegase ua aafia ai o latou fatuga‘o.
O lea na aumai ai le fesoasoani mai i Singapore e ala i masini aemaise o fomai na amata ai lenei nofoaga ua faaigoa nei o le Nofoaga o togafitiga o gasegase o fatuga‘o.
Na amata e fomai mai i fafo lenei galuega ae na iu lava ina aoaoina fomai atoa ai tausi soifua o Samoa lava ia ma o i latou la ia ua faatautaia nei le galuega tele lenei i aso uma o le faamamāina o toto o le atunuu.
O le vaavaai alualu mamao foi lea a le Malo ma le Matagaluega o le Soifua Maloloina i potu o taotoga ua faamautu nei i le falemai fou lea ua faatūina nei, o le Tupua Tamasese Meaole i Motootua.
O lea ua iai le fale ae o le ‘anofale ua agai nei e faamautu ma o le ‘afa lea ua iai, e ala i masini mo taotoga ae o lea o le a agai le Matagaluega i le unai mai lea o fomai o le atunuu e faatautaia taotoga moomia.
O le taimi lenei na ta‘ua e le alii Palemia, o le a agai pea le malo i le aumai lea mai i Niu Sila ma isi atunuu mamao o i latou e mafai ona faatautaia taotoga faigata e lē o maua i Samoa i latou e iai ia tomai faapitoa, aemaise i taotoga o le fai‘ai se‘i tulou, o se tasi o gasegase ua toatele le atunuu ua avatu i Niu Sila e faatino ai, o gasegase o le fatu atoa ai isi totoga o loo faigata lava ona maua ni fomai latou te faatino.
O loo iai faigamalaga ua ofo mai ai le fesoasoani a le toatele o fomai mai fafo e afea Samoa peitai ua na o le taitasi i le taitolu masina ma vaaia nei faigamalaga ma e lē o se faiga tumau foi auā e fua lava ia i latou e iai le manaoga e faia ia galuega.