Toafitu alii molia i faiga aiga faamalosi i le afafine o le faifeau

E toafitu lelei ni alii talavou o le tupulaga lea e ta‘i 17 ma le 18 tausaga o le a tulai i luma o le Faamasinoga Maualuga i le vaiaso lenei, ona o tuua‘iga o le ave faamalosi o se tamaitai ma le fai i ai o ni uiga matagā ma le ogaoga.
O se moliaga lenei na tulai mai ona o se faalavelave na faamaonia mai e le Ofisa o Leoleo i le faaiuga o le lua vaiaso talu ai.
O le faamatalaga o lea faalavelave, o le tamaitai o loo aafia i lenei mataupu o se alo o se tasi o faafeagaiga i totonu o le afioaga o Falefa. Sa auai atu i se valaaulia o se Aso Fanau na faia lava i totonu o le nuu o se isi foi tamaitai talavou.
O se fiafia tele sa faatautaia ai ma na ta‘ua le tagofia ai foi o le ‘ava malosi. Sa faaalia e nisi sa iai i lea fiafia na mafai ona talanoa mai, sa iai se taimi na saili ai poo fea le alo o le faafeagaiga ae ua faapea nisi ua agai i lona aiga, peitai faatoa manino mulimuli ane ua ave le teine i le taimi lea e alii ua tuua‘ia.
Sa maua mulimuli ane lea tamatai i se fale e latalata ane lava i le fale na fai ai le fiafia ma na ta‘ua e i latou na maua mai ai le tatou lipoti, sa iai i se tulaga faaletonu lava lea tamaitai ma ave ai loa i le falemai.
O le vaiaso na tea nei sa taofia ai lea tamaitai i le falemai tele i Motootua a o faagasolo ai suesuega a le Ofisa o Leoleo.
O lea la ua faamautu mai e toafitu alii ia e tatau ona tulai i le amataga o lenei vaiaso i le faamasinoga e tali i moliaga o le faia o se faiga aiga faamalosi faasaga i le tamaitai lenei.
Na ta‘ua le faatalitali o le afioaga i suesuega nei ma le faagasolo ai o taualumaga o le Faamasinoga ona faatoa fai lea o se latou foi iuga i lenei mataupu talu ai le ogaoga  o le osofaiga ae lē gata i lea o le va nonofo ai o le afioaga ma le Susuga i le Faafeagaiga e ana le afafine ua aafia nei.
A o faasolo pea la suesuega a Malu o le Malo, o lea na faaavanoa le afiafi o le Aso Tofi na mavae atu nei mo se feiloaiga a sui o le Matagaluega faapea ai sui o le afioaga atoa e amata mai lava i fanau laiti seia oo i tagata matutua.
O le ‘auga o le feiloaiga ina ia toe faamanatu lava i le afioaga solitulafono e tatau lava ona vaavaai ma puipui i ai le afioaga ma ia faamalamalama lelei i tupulaga o le afioaga le matautia o le faalavelave ua tulai mai.
O le mafutaga faaleaoaoga na taitaia e le vaega o feagai ma sauaga i totonu o Aiga, a le Matagaluega o Leoleo ma Falepuipui.