O le afioga Ta‘inau Moefaauo Taputoa Titimaea, e valaauina e lona matai ua oo atu i le 11 tausaga o tautua o se Ofisa Sili o le Pulega o le Suavai a le atunuu.
O lona sao i le suiga ua iai nei fesootaiga o le suavai ma le faasoasoaina ia soo atoa Samoa o se tasi lea o tautua o le a manatua ai lea auauna e pei ona saunoa i ai le alii Palemia, le susuga Tuilaepa Lupesoliai Sailele Malielegaoi i toe sauniga o lea auauna na faatautaia i le Malumalu o le Ekalesia Metotisi i Matafele i le faaiuga o le vaiaso na tea nei.
O se tamā e tausi aiga, e fai uso ma fai tuafafine, ma e pele ia te ia lana ekalesia, le Ekalesia Metotisi.
O nisi nei o molimau o le soifua auauna o lenei tamalii e pei ona tumutumu atu le atunuu e amata mai lava i le afioga mamalu i le Ao o le Malo, Tuiatua Tupua Tamasese Efi ma lana masiofo ia Filifilia atoa ai le Palemia ma le Kapeneta, Sui o le Palemene o Samoa, Ofisa Sili ma sui o Matagaluega ma Faalapotopotoga a le Malo.
O sui o le Ekalesia na tautua ai o se Failauga atoa ai uo ma aiga auā lava le molimauina o toe sauniga o lenei auauna.
E maliu Ta‘inau Moefaauo e faatoa 53 tausaga o lona soifua ma e toatolu o la alo ma lona faletua ia Ellen Titimaea. Faaalia e lenei tina, o Moefaauo, poo fea lava o le lalolagi e iai i ana malaga i fonotaga a le malo, e lē misi le po e vili mai ai i le telefoni e momoli mai ona alofaaga ia te ia ma le la fanau e toatolu, o uiga o se tamā e pele lona toalua ma lana fanau ia te ia.
Ua silia i le 20 tausaga o le auaunaga a lenei tamalii i le Malo ma na faapea foi ona galue o se inisinia i le Faalapotopotoga o Malosiaga tau eletise (EPC) a o lei see ane e avea ma faauluuluga o le tasi lenei o faalapotopotoga tele i totonu o Samoa.
O lana auaunaga i totonu o le Ekalesia Metotisi na molimauina ai le naunau i atinae a le lotu e pei ona ta‘ua ai e le Failautusi o le Ekalesia na iai le taimi na tausinuu ai lenei tamā ma lona faletua i le Matagaluega a le ekalesia i Siusega lea o loo iai lo la maota ma lona aiga.
O lo la fanua lea o loo lagomau ai nei lea auauna.
