Ua tele lipoti e masalomia ai le alu ese o Papalii Panoa Tavita Moala
O le faalauiloa ai o le faamavaega a le Peresitene o le Tautua Samoa, Papalii Panoa Tavita Moala, na ia ta‘ua ai ua mafua ona ua moomia le ave o le faamuamua i ana atina‘e tau pisinisi i le taimi nei.
Talu ona see ese le susuga Papalii Panoa mai le pulega o le NPF, ua faatuina sana pisinisi o meaai a lafumanu e pei ona gaosia i sana atina‘e i Nuu.
Ua faapea foi ona ia faatautaia ni atina‘e o se lafupuaa faapea ai lafumoa ma isi mau atina‘e i le itu tau i faatoaga.
Faaalia e lenei tamalii e tele lana lagolago i le Tautua, ae ua faigata ona atoatoa lona taimi e ave i sauniuniga a le Tautua i le sauni ai i le faigapalota ona o lea foi ua moomia lona taimi i galuega a lana pisinisi.
Faaalia e lenei alii o loo tumau lava lona iai i le Komiti Faafoe a le Tautua ae o le tofi Peresitene ua matuā leai lava se taimi e faatautaia ai i le tulaga e gata ai le faigaluega lelei i ona tofiga nei.
Ua tele foi lipoti e masalomia ai le alu ese o le Peresitene, ma o nisi ua faapea mai e lē o mafai ona tulai mai Papalii Panoa i le tofi ona e lē o tauva i le sailiga faipule o le Palemene mo le tausaga fou.
E manino lava tusa pe tamoe pe lē tamoe foi Papalii Panoa e leai se mafuaaga e aafia ai fua lona tofi Peresitene, ae o mafuaaga ia ua ia ta‘ua i le tatou Ofisa.
O Afualo Dr Wood Salele, o se faiaoga o loo taitaia le Aoaoga o Pisinisi i le Iunivesite Aoao o Samoa, lea ua sui tulaga nei ia Papalii Panoa Moala.
O Afualo o loo tauva mai i le Itumalo o Salega i Savaii ma o se tamalii sa tofia o le Sui Peresitene o le Tautua.
Faaalia e lenei alii le manaoga ina ia finau le Tautua e avea ma Vaega Faaupufai e mafai ona sili atu ni ana galuega ma ia ausia se isi maualuga i le taitaiga o Samoa pe a manuia i le faiga palota tele a le atunuu.
“E moni ua lelei galuega ua faatino e le HRPP ae e tatau ona lelei atu, ma e mafai ona lelei atu auā ua foliga mai ua faamalieina lava le HRPP i le tulaga o iai ae ua leai nisi suiga lelei atu e unai ai le tamaoaiga o Samoa, e tatau ona lelei atu le tulaga o iai le soifuaga o tagata Samoa nai i lo le tulaga o iai nei,” o se faaaliga lea a le Peresitene fou.
O le vaiaso fou lea ua fuafua le Tautua e faalauiloa ai ona sui tauva ae e lua lava itumalo ua ta‘ua e Afualo o loo moomia ai ni sui tauva mai i le Tautua i le taimi nei, ae o isi itumalo faaalalafaga uma ua mautu uma sui o le Tautua e tausinio ai mo le tausaga fou.
