Raphael Alualu: Mum e te toe foi mai afea? O le ā le umi e te alu ai i Samoa?
Puemanu Telesia Alualu: Ou te lē iloa poo le ā le umi ou te alu ai. Sei vagana lava ua ta‘u atu ua e tama lelei ma e usitai, faato‘ā ou toe foi mai.
O le talanoaga mulimuli a Raphael ma lona tina o Telesia a o sauni le tina e malaga i Samoa e asi le gasegase o lona tuaa. O le po a malama le taeao e malaga ai le tina i Samoa, lea sa faia ai le la talanoaga ma fesilisili ai Raphael i lona tina.
Sa ta‘ua e le tina, o se taimi muamua lea ua faapea ane ai lana tama ia te ia, ma ia vaaia foi sa tagi lava i lea po, a o sauni lana malaga i Samoa. Peitai o le iai i Samoa, ae ta‘u atu le faalavelave sa tupu i si ana tama, sa ia toe mafaufau ai i le la talanoaga, ma fesili sa fesiligia ai o ia.
Sa ia toe mafaufau foi i le tagi a si ana tama i lea po, ma ua se ata faasolo i lona mafaufau ma faapea ane ai ona lagona, ai lava o le mafuaaga lea na tagi ai si ana tama, ma fesilisili, ona o lea o le la lē toe feiloai a o ola pea.
E ui ina ua mou mālie atu le tino o le atalii ia Raphael Alualu ina ua mae‘a ona tanumia ma ua taoto nei i lalo ifo o le laueleele ma lona tuugamau, peitai o loo iai pea ni fesili e lei maua i ai se tali, e pei ona tuufesili ai pea le tamā ma le tina ma le fanau loto faavauvau.
E oo lava foi i nisi o aiga na malaga mai Samoa, a o nisi foi o loo alaala ma papaaao i Niu Sila, o loo tafili pea e manatu lē mautonu, ma lagona lē faamalieina i le faalavelave na tupu ma maliu ai se alo e faasino i le tofa ia Tulatuli Alo ma le tausi, poo le afioga foi ia Puemanu Telesia Alualu o le afioaga o Vailele ma Mt Roskill i Aukilani.
O le mae‘a ai ona falelauasi o le atalii ia Raphael Alualu i le vaiaso talu ai, ae toe tulai mai se isi faamatalaga e foliga ua toe aveesea ai le toafilemu ma le toafimalie o finagalo o mātua ma le aiga.
O se faamatalaga sa toe faamatuu ane e le ofisa o leoleo, sa ta‘ua ai le tatau ona faia se suesuega faapitoa o le atalii, talu ai e faapea se latou lipoti, sa solouli pe totolia ni vaega o ona foliga i le taimi na maua a‘e ai mai le taele poo le alititai o le vaituloto sa malemo ai.
O lea faamatalaga sa faatalai i ai le aiga poo fea e fai agai i ai, a o le ā foi le isi laasaga o le a toe faia ona ua mae‘a ona tanu le atalii. O se faaupuga e faapea e tatau ona toe faia se isi taotoga faapitoa mo se suesuega, e foliga mai ai e tasi le auala e faataunuuina ai, o le toe laga i luga o le tino maliu o Raphael, ma faia i ai lea faamoemoe, pe afai ae faamaonia ma manaomia lea tulaga e pei ona ta‘ua.
O se tulaga e matuā lē talia lava e mātua ma le aiga, pe afai ae ono tupu ma taunuu lea fuafuaga a leoleo. O le isi tulaga e lē o nofo filemu ai foi mātua o Raphael, ona talu ai sa ta‘ua i nisi o molimau, sa iai ni vaega o totoga se‘i tulou e patino i le atalii, sa aveesea mai a o lei aumaia i tua lona tino maliu.
E lē o fia talanoa tele i ai Tulatuli ma Puemanu, o mātua ia, i le tulaga ona o le moni o le alofa i lo la alo. I saunoaga a le tamā ma le tina sa faailoa ai lo la faanoanoa tele i vaega e lua e pei ona ta‘ua mulimuli ane, ina ua mae‘a ona tanu le atalii.
O le Aso Sa, aso 12 o Tesema, o se feiloaiga mulimuli a le Samoa Times ma mātua ma le aiga, ma sa toe fesiligia ai pe na toe fesootai ane le ofisa o leoleo mo se isi faamatalaga lata mai e uiga i vaega sa ta‘ua. O le tali mai a le tamā ma le tina, e lei toe maua ane se faamatalaga a leoleo i mataupu ia.
E lē gata i le va ma leoleo ma le falemai, ae o loo fesiligia pea lava foi le mafuaaga o le malemo o Raphael, pe a fua i faamatalaga ma molimau a tama ma teine o le aoga sa iai tonu i le taimi ma vaavaai i le mea moni na tupu.
O molimau a i latou ia e pei ona sa faamatalaina, sa ta‘ua ai na toe manu a‘e i luga Raphael ina ua umi se taimi o faatali ina ua mavae ona oso ma tofu ifo i le vai. O le taimi na toe manu a‘e ai, sa latou manatu ai e leai se faafitauli ma se faaletonu ia te ia.
Peitai o le toe magoto ifo i lalo ma ua lē toe foi a‘e lava mo se taimi umi, ua avea o se tulaga e lē o talitonu i ai.
E manatu i latou ana faapea na malemo i le taimi muamua, e lē toe manu a‘e i luga, peitai sa latou vaaia lona manu a‘e, ae na toe goto i lalo e pei o se tagata o loo fia ola, ae o loo lelemo ma toso ifo e se isi agai i le ta‘ele o le vai.
O ni fesili taligata ia o loo nonofo nei ma mātua ma le aiga, ina uma le vevesi ma le fememeai i le toesea faanatinati ma le faafuasei o le atalii.
O se taimi pe tusa o le ta o le tolu i le afiafi o le Aso Lua, aso 30 o Novema sa ta‘ua na tupu ai le faalavelave, ma amta ai loa ona saili se fesoasoani mo le tau sailia o lona tino.
Peitai o le taeao o le Aso Lulu, aso muamua o Tesema, na faato‘ā maua ai lona tino maliu. E faitauina e faapea e tusa ma le 20 itula sa nofo ai lona tino i lalo o le vai, ma le vaega tonu sa maua ai.
Sa fesiligia foi pe aisea na faatuai ai ona faia galuega saili, peitai o le tali e faapea na aami se autofu faapitoa mai Ueligitone, latou te sailia le tino o Raphael.
O le isi faamatalaga e faapea, sa fai si pogisa tele o le afiafi o le Aso Lulu na tupu ai le faalavelave, o le isi lea mafuaaga o le faatuai ona maua le tino.
O lipoti a le aumaulu, poo le autofu sa ta‘ua ai e tusa ma le 75 mita le loloto o le vai ma o le loloto ma le maualalo foi lea sa taoto ma taatia ai le tino maliu.
O loo ua taoto ai faapea le feiloaiga i le va o mātua ma le aiga o Rahael, ma le ofisa o leoleo.
Peitai ua mae‘a foi ona fautuaina e le uncle poo le tuagane o le tina ia Telesia, na malaga mai Samoa, o ia foi o se tasi o lupe faalele a le aiga i le galuega a le Atua, ina ia taofi mamalu, ma aua ne‘i toe faia se isi gaioiga faaletulafono. Ia silasila pea ma faamoemoe i le Atua, o ia lava e aumaia le taui, o ia foi e ona le tagata atoa.
Mafutaga a mātua ma Raphael
Sa tutusa molimau a le tamā ia Tulatuli ma le tina ia Puemanu e uiga i le latou mafutaga ma si o la alo. Sa ta‘ua e mātua o se tama faigata tele, o ona uiga e filemu, ae fai lava si faigata. O le ala matemategata foi lea o ona uiga ma ana mea e fai.
Ae ui lava i lea, sa lē tuua ai lo la tiute o le faatonu pea ma a‘oa‘o, fautua malosi i ai. Sa vaaia foi le suiga tele sa tulai ma i lona olaga. Auā o le tele lava o taimi ma tausaga e faafitauli tele toe ulavale aemaise lava o le va ma isi tamaiti talavou.
Ae sa manumalo pea le alofa faamatua sa mafua ai ona lē tuua le aoaiga ma le faatonu. O lana aoga mulimuli lea na oo ai lava foi ina maliu ai ona o le latou tafaoga sa alu i le vaituloto, lea na tupu ai lava ma le faalavelave. Ua maliu atu le atalii, ae o loo tumau pea lo ma fiafia ona o le tele o taimi sa usitai ma faalogo Raphael i le la talanoa atu i ai.
O le tulai mai o lenei faalavelave, o se vaega ua toe faamamafaina ai e le vaega e vaaia ma pulea le sami ma vai mo tagata lautele, ina ia silasila toto‘a i le saogalemu, ma puipuiga o nofoaga faapea, ae aua le faalagolago i le poto malosi ma le atamai.
Sa feiloai atu i se tasi o tamālii o le atunuu le susuga ia Ben Taufua, o loo seei i le tofiga pule mo le vaia o le saogalemu i le sami ma vai.
O le maliu o se alii talavou Samoa e alaala i Mt Roskill i Aukilani i le vaiaso talu ai ina ua malemo i se tasi o vai i North Shore i Aukilani lava, ua faateleina ai le popole atoa ai ma fautuaga mai le mamalu o le atunuu i le aai.
E lē gata ina faatupulaia o faamatalaga o fautuaga ma timaiga ona o le vaitimi ua iai lenei tausaga i le tele ma le anoanoai o tafaoga o le a agai i ai tagata ma aiga, ae ua tuufesili ai foi nisi ona o faamatalaga sa faamatuuina e tagata e ona le laueleele poo tagata Maori.
E iai tulaga sa ta‘ua e nisi, ma sa faamaonia foi e le toatele sa talanoa i ai, aemaise lava aiga sa maliliu ai foi o latou tagata i le vai lava lenei. Sa faaalia ai le tulaga lamatia tele ona o ni vaega e manatu o ni tapu a fanua i le tu ma aga a tagata whenua.
Sa molimauina e nisi e leai sona eseesega tele o faiga ia ma tu a tagata Maori, ma le tulaga foi o Samoa, e iai lava tapu faapea i le tele o afioaga ma nuu. E iai foi le taofi o le toatele e tatau lava ona amanaia ma faaaloalo pea i ai e tusa lava pe lē masani ai.
Ae pule lava le tagata ia ma lona finagalo pe talitonu i ai pe leai, ae sa taumafai lava ina ia aumai pea se faamatalaga mai ia i latou o loo vaaia ma nafa ma le saogalemu o tagata lautele i totonu o vai, ma le sami.
O le susuga ia Ben Taufua, o se tamalii Samoa o loo avea ma pule o le vaega a le Pasefika latou te vaaia le saogalemu o vai ma le sami. (Pacific Water and Safety Manager). E lē gata foi i lea, a o ia foi o se sui faatonu o le matagaluega lava lea i le atunuu atoa o Niu Sila (Water Safety New Zealand)
Na saunoa Ben Taufua i se talanoaga ma le Samoa Times e faapea, e tusa lava poo ā talitonuga ma le mau faamatalaga a le toatele i le mafuaaga ma le tulai mai o le faalavelave na maliu ai lea talavou, ae lē mafai ai lava ona tuuina pe taofia ai le agaga o le matagaluega ma ona tiute tauave, o le taulogologo pea ma faalauiloa auala o le saogalemu.
E lē gata foi lea, ae atili ai pea ona faaleotetele fautuaga ma timaiga e tauala i leitio ma nusipepa poo le televise foi, ina ia manatua le saogalemu i nofoaga faapea. Saunoa Ben e maitauina pea i tausaga taitasi le faatoateleina pea o tagata maliliu i totonu o vai taele, ma vaituloto, ma le sami. O le tele o faalavelave ua maea foi suesuega, ma maua ai o le le faaetete lava ma le le usitaia o puipuiga ma faatonuga.
O soo se vaega o le sami poo le vai e faatutū ai ni faailoilo ma faapipii ai faatonuga, e ao lava ina usitai i ai ma mulimulitai. E mafua ona iai ni lapataiga i vaega e pei ona ta‘ua, talu ai e iai foi mafuaaga ma uiga.
O le isi mafuaaga tele o faalavelave faapea o le malemo, ona o le lē silafia o tulaga masani e pei o le aau ma isi gaioiga e faia. Ae na ta‘ua e Ben ma ia toe faamamafaina e tusa lava foi pe malosi, ma poto e aau, e lē mafai lē mafai lava ona laveaina, pe a oo ina malosi tafega ma le aave.
E ao ai i soo se tagata ona amanaia pea ma taulai le silasila i faasalalauga ma faasilasilaga faalauaitele mo le saogalemu. O lenei vaitaimi o le tausaga e masani lava ona faateleina ai faalavelave i le sami ma le vai. E lē aogā foi ona faamoemoe i le poto masani ma le agavaa, ae vaai toto‘a i le saogalemu.
O loo fautuaina malosi foi e Ben le au fagogota ma le au faifaiva ina ia aua le vaai ma manatu māmā i le silafia lelei o le tala o le tau ma ona uiga, a ia fesili pea ma taulai i faatonuga ma lapataiga mo le saogalemu.
