Ua toe lua tausaga ona mae’a lea o konekarate tai tolu tausaga ile tofiga Komesina Lagolago o Leoleo, ae ua faateia le toatele ina faailoa le faamavae ole susuga Fauono Talalelei Tapu ma le tofa Fata Leiataua Aviga Salale ma o la tofiga. E lei maua se avanoa i nei tamalii e faailoa ai ni o la finagalo e tusa ole la faaiuga ae ole a foi le mafuaaga aua e faatoa mae’a a la konekarate ile tausaga e 2019.
Peitai ua faailoa ele sooupu ole Matagaluega o Leoleo le susuga Salaa Moananu Sale Salaa, ua fautuaina ele Malo le faamavae loa oi laua aua o lea ua pasia ele Palemene le teuteuga ole Tulafono o Galuega faaleoleo ole a toe tofia ai se Sui Komesina o Leoleo e lagolago ile Komesina.
O teuteuga foi o lea tulafono ua soloia ai le tofiga ole Komesina lagolago ole Matagaluega o Leoleo. Na afua uma nei teuteuga ma tuuina atu ile Palemene ona o feteenaiga na tulai mai ile matagaluega e faasino i moliaga na faia faasaga ile Komesina le afioga Fuiavailili Egon Keil. Na laumanu’ia ai le aafia tele oi latou oloo ile pulega i gaioiga e fesootai ile suesuega na faia e nisi o leoleo ma taunuu ai ile faia o moliaga ia na toe faasolomuli i tua mai le faamasinoga maualuga.
Ole Aso Faraile ua mavae na faia ai le faamavaega ale Komesina ma le Matagaluega ma Komesina lagolago ua tua o la tiute.
Ua faafetaia ai ele Komesina le afioga Fuiavailili Egon Keil le tele o tausaga sa tautua ai Fauono ma Fata ile galuega faaleoleo ile tautuaina ole Malo ma le atunuu. Ua silia ile fa sefulu tausaga talu ona galulue i laua oni Malu ole Malo. Ole lua tausaga oloo totoe pea o a la konekarate ua faaalia e se molimau faatuatuaina mai le matagaluega o leoleo ua totogi uma iai laua.
Ua ave foi iai ma nisi o faamanuiaga e agavaa iai. E faamavae nei Fauono Talalelei Tapu oloo faauluulu iai galuega a leoleo i Tuasivi i Savaii, ae o Fata Leiataua Aviga sa galue e lagolago ile Komesina ile ofisa autu i Apia.
Ua ave faamanuiaga ale Komesina faapea le Minisita o Leoleo le afioga ile Palemia i ia tamalii ina ia manuia lo la lumanai ma ni taumafaiga ole a sagai atu iai. E iai le talitonuga e le o toe mamao ae faasalalau le avanoa ose Sui Komesina o Leoleo.
