Tatalo ile Atua e tofi mai se isi Minisita

Ua faaalia ele afioga ile Palemia ole tatalo ma le musumusuga ale Agaga Paia e faalagolago iai le filifiliga ose isi Minisita o lana Kapeneta
Ua faaalia ele afioga ile Palemia ole tatalo ma le musumusuga ale Agaga Paia e faalagolago iai le filifiliga ose isi Minisita o lana Kapeneta

E le o natinati se filifiliga ale Palemia mo se isi Minisita fou o lana Kapeneta e sui ile faipule o Gagaifomauga numera 3 le susuga Laaulialemalietoa Leuatea Polataivao Fosi Schmidt ua faamavae ma le tofi minisita.

Na fesiligia i lana polokalame masani ile leitio poo ai, ae o lana tali e faalagolago ile musumusuga ale Agaga Paia ma o tofiga uma e mai le Atua. O lana tuualalo foi ile atunuu ia tatalo ma tuu atu ile Atua poo ai e filifilia.

Ole susuga Laaulialemalietoa Leuatea Polataivao Fosi Schmidt ua faamavae ma le tofi Minisita ole Kapeneta
Ole susuga Laaulialemalietoa Leuatea Polataivao Fosi Schmidt ua faamavae ma le tofi Minisita ole Kapeneta

le Aso Lulu ole vaiaso ua mavae na faamavae ai le susuga Laauli ma le Minisita o Faatoaga, Faigafaiva ma le Ofisa o Suesuega Faasaienisi ina ua faia e leoleo ni moliaga faasolitulafono faasaga ile Minisita.

O lona faletua foi ma se isi Faatonu ole latou kamupani nonu ole Local Partners and Associates oloo molia ai foi ona ole tagi a se isi Faatonu ole kamupani le Minisita lagolago ole Matagaluega ale Palemia ma le Kapeneta ma le Matagaluega o Leoleo le afioga Peseta Vaifou Tevaga.

Ile saunoaga faamavae a Laauli na ia faailoa ai lona mamā mai tuua’iga e pei ona faavae ai moliaga a leoleo faasaga i lona tagata. Ua ia asu vai malu ile faafofoga a lona itumalo ona o lana faaiuga ua taunuu iai ile tofi minisita, ae ua ia tautino ua sauni e tuuina atu i luma ole faamasinoga mau e lagolago ai lona teena o moliaga ma faamama ai lona suafa.

E pei ona silafia oloo talia nei se faaiuga ale faamasinoga maualuga ile tagi ose su a Peseta Vaifou Tevaga faasaga i faatonu ole kamupani nonu. O Laauli, ma Apulu Lance Polu o nisi ia o faatonu oloo faasaga iai lea su.

Ua fa tausaga talu ona tulai mai feteenaiga i totonu ole kamupani e pei ona faaalia ele afioga ile Palemia susuga Tuilaepa L Sailele Malielegaoi ma sa iai lona manatu ole a fofo a alamea peitai o lea ua oo lava ile faamasinoga.

Faaalia ele Palemia lona agaga faafetai ile lototele ole faipule o Gagaifomauga Numera Tolu, ma lana faaiuga e faasee tuagalu ma le tofi Minisita ae faatali taualumaga ale faamasinoga.

Faaalia e Tuilaepa ose faaiuga ua faia e Laauli e tusa o faiga masani a Malo temokarasi ina ia puipuia ai le mamalu ole Malo aemaise ole tausisia ai o auala manino ma auala malamalama o faigamalo faatemokarasi.

Ua mafatia ai lagona ole Palemia ma minisita o lana Kapeneta peitai ua talia le faamavaega a Laauli. Ole Minisita lagolago oloo iai nei ole Matagaluega o Faatoaga ma Faiga Faiva ma le Ofisa o Suesuega Faasaienisi ole tofa Faasootauloa Pati.