Faamatala le upu…e ala i le taulogologo

O se tasi lea o anavatau o loo avea ma poutu e limataitaiina ai foi se moemitiga ua loa ona tuutaliga ma faamautuina foi i le loto o le susuga i le faafeagaiga ia Reverend Tafā Faamatala,  a o ia sailitofā atu i le musumusuga a le Agaga Paia, mo le faatinoina o lenei moemitiga.
Ua mae‘a nei ona tapenaina ma tatala aloaia aemaise foi o le faalauiloaina o lenei moemitiga ina ua tau lau o le faatautaiga e ala i se tusitusiga poo se lomiga ua faaigoaina, ‘O le Finagalo o le Atua i le Tatalo’. O lenei tapenaga o loo faatautaia lava e le susuga ia Rev Tafā Faamatala aemaise ai o le lagolagosua a lona faletua ia Lagi i lalo o le faamalumaluga ma le galuega ua mae‘a ona iai le faasinomaga ua valaauina faapitoa ai i laua, le ‘Faamatala Le Upu Ministries’.
E sili ma le sefulu tausaga o avea le susuga ia Tafā ma faiaoga i se tasi o aoga Tusi Paia i Samoa, le Rhema Bible Training Centre. Ae ina ua to le matū palapala mai le lagi sa faapea ona tuua ai loa e le susuga ia Tafā le Rhema ae sagai mo le faatinoina o le polokalame o aoaoga faaleagaga i luga o le televise a le Kingdom TV faapea le leitio i Samoa ma Amerika Samoa.
O loo faaauauina lenei auaunaga e oo mai i le taimi nei. Ua la folafolaina foi le Upu a le Atua ma faatino ni semina i ekalesia eseese i Amerika, Hawaii, Amerika Samoa, Niue, Vanuatu, Rarotonga, Niu Sila, Ausetalia ma Samoa. O le ‘Faamatala Le Upu Ministries’ e lē faapito augafa i se ekalesia. O le naunautaiga i le susuga ia Tafā ma le faletua ia Lagi ina ia fesoasoani i uso a Kerisiano ma avea i laua ma faamanuiaga i soo se ekalesia, aemaise le Tino o Keriso, e ala lea i le taulogologo ma le aoaoina o le Upu faauuina a le Atua.
O se faamoemoe e lei faigofie ma sa umi se taimi o taumafai ina ia tuufaatasia. E fitu vaega o loo vaevaeina i ai lenei tusitusiga ma o loo maketiina e le gata o Samoa a o Niu Sila ma atunuu mamao.  E $10NZD le tau faapitoa o loo amata faalauiloa ai lenei tusi. Ma o se avanoa lē aumaua foi lenei ua tuuina mai e susuga ia Tafā ma Lagi e okaina ai sau kopi o lenei tusitusiga.
E mafai ona e maua lea i le imeli: faamatalaleupu@samoaonline.ws poo le telefoni (685) 770-0290 ma le telefoni i Niu Sila (09) 2755520.