Atoa le tausaga o le Ekalesia Showers of Blessings Samoan Christian Church i East Tamaki

O le viiga e foi i le Atua ona ua faataunuuina ma le manuia le faailogaina o le atoaga o le tausaga talu ona faatūina le Ekalesia fou, Showers of Blessings Samoan Christian Church East Tamaki, e pei ona iai e oo mai i le taimi nei.
Sa faatūina lenei Ekalesia i le aso 28 Aperila 2012 i le na o le 8 matafale ma le aofaiga o tagata lotu e 59. Peitai e oo mai i le aso 28 Aperila 2013 ua 15 matafale ma le aofaiga e to‘a 102 o tagata lotu, i lalo lava o le taitaiga a le Susuga Rev Fineaso Faavae ma le faletua ia Tausaga Faavae.
Ua vaaia lava le matuā faamanuiaina o le galuega e lē gata ua tuputupu le ola faaleagaga, aemaise foi o vaega eseese uma e pei ona iai le vaaiga i le maoae o loo laalaa i luma o le Worship Team e pei ona vaaia i ata aemaise foi o le vasega o A‘oa‘o ma o latou faletua.
O se sauniga sa matuā faatumulia i le mamalu ma le paia o le Atua e amata mai lava i le taimi o le Sauniga seia oo i le taimi o faaaloaloga.     Sa faatumulia foi i le paia eseese o le auvalaulia aemaise o tapenaga e ala i aitema a Ekalesia e tolu sa valaaulia, ma na faaiuina i se taumafataga tele sa saunia lava e le paia
o le Ekalesia.
Tau ina ia alofagia e le Atua ia tuputupu pea ma ia saga mumū pea le lamepa o le ola faaleagaga i lana fanau tapuai, ae o la Iesu: “O Peteru oe ou te atiae foi la‘u Ekalesia i luga o lenei papa e lē mafai lava e faitotoa o Seoli ona manumalo i ai.”