Na finau le susuga Malolo Aumua i le faamasinoga e leai se la faigaupu ma lē na tagi i leoleo a mea e na te totogi iai se tinoitupe e $6,000 tala ona avatu lea o le taavale ia te ia. I le valaauina muamua o le mataupu lenei i luma o le faamasinoga maualuga na faailoa ai e Malolo o le la faigaupu e fesuiai a la taavale ma o le mafuaaga lea na tusi ai lē ua molia i le LTA poo le pulega o feoaiga i luga o le laueleele e liliu loa le taavale a lē ua tagi i lalo o lona suafa. Peitai o le tusi na ave i le LTA na tusia e Malolo ma ia saini ai le suafa o Puleaga Sili ma le faamatalaga ua malie lē e ana le taavale e liliu loa le ownership poo le tagata ua iai le pule atoatoa i le taavale.
Na faaalia e le tamaitai faamasino le afioga Mata Keli Tuatagaloa pe o le faigaupu e totogi le ono afe tala poo le fesuiai o taavale, o le moliaga a leoleo o le saini faamalosi o le suafa o se tagata e aunoa ma le saini e lea tagata o lona lava suafa ua faaalia ai sona maliega e liliu ese loa le tagata e umia le meatotino o le taavale. O Malolo Aumua ua 37 tausaga o lona soifua ua faaipoipo e toalima ona alo ma lona toalua. E faigaluega o se avetaavale i le ofisa o le Amepasa o Iapani i Samoa.
Na finau lana loia i le faamasinoga e faapafala se faaiuga e aunoa ma le faamaonia o le moliaga o Malolo poo le discharge without conviction. Na finau lana loia a faamaonia le moliaga ua faigata ona toe maua se galuega a Malolo. O le isi mau na faavae ai lea finauga a lana loia ona e faapea o le faatinoga o le solitulafono e lei taupuleina ma fuafua lelei lona faataunuuina ma a faavasega ma isi solitulafono faapea e maualalo lava.
Peitai sa finau loia a leoleo mo se faasalaga faafalepuipui e 18 masina ona o le mau a leoleo sa fuafua lelei le faatinoga o le solitulafono. Na faaaogā e loia a leoleo le faaiuga a le faamasinoga i le moliaga lea na faasala ai i le falepuipui le susuga Hawaii Lavea i lona saini faamalosi o le suafa o le Sa’o ma ave lesitala lona matai i le ofisa o faamasinoga o fanua ma suafa.
Ina ua aumai le faaiuga a le faamasino le afioga Mata Keli Tuatagaloa na ia teena le finauga a le loia a lē ua molia ae ioe le faamasino i le finauga ma folasaga a loia a leoleo. Peitai na faaalia e le faamasino e talafeagai le toe tuu o se avanoa mo lē ua molia e toe faafou ai lona tagata ia avea o se tagata e usitai i tulafono ma aloese mai le soli o tulafono.
O le silasila a le faamasino i le faaiuga o le faamasinoga na faavae ai le finauga a leoleo i se faasalaga faafalepuipui e tutusa le ogaoga o le faatinoga o solitulafono peitai o le mataupu ua molia ai Malolo e fai si feololo o lona tulaga matuia pe a fua i le matuia ma le ogaoga o le gaioiga na tulai mai ile faamasinoga o Hawaii Lavea.
Ua manatu ai le faamasinoga e tuu atu le 12 masina e nofo vaavaaia ai Malolo Aumua ma ia aua lava ona ia toe soli se tulafono i totonu o le 12 masina. Ua faatonuina foi e totogi le 300 tala mo le galuega a leoleo.
