Pese le Palemia o Samoa i le 50 tausaga o le Punialavaa

Le taimi o le pese a le Palemia
Le taimi o le pese a le Palemia

O le tumutumu ma le le ofi o totonu o le maota o Samoa i le po o le Aso Toonai, na faalologo ai le toatele o nei tagata ma latou iloa ai e lelei foi le siufofoga o le Palemia o Samoa i pesega. O le sao o le afioga i le Palemia le susuga ia Tuilaepa Aiono Sailele Malielegaoi i le tatalaina o le cd fou a le Punialavaa faatasi ai ma le patipatia o le atoaga o le lima sefulu tausaga o lana tautua pese, na ia usuina ai lana pese e faafiafia ai le mamalu o le atunuu, aemaise ai o ona alofaaga ma faamanuiaga na taualugaina ai lana lauga, mo le susuga i le fafeagaiga ia Rev Lale Peteru ma le faletua ia Vini faapea le nofoaalo.

O le saunoaga autu a le afioga i le Palemia na ia taua ai le tele o vaega e taua ai le pese i le soifuaga o le tagata.

O le pese e fafagu ai le taleni ua aumai e le Atua, o le pese e aualofa ai le tama i le teine, o le pese e fai ma viiga o le Atua. E tatalo le pese, e pese foi le tatalo, ma o le faia e le tagata o ia vaega e lua i lona olaga ma e foliga mai ai ua lua ana tatalo i le Atua, ma ose vaega pito sili lea ona taua.

O le toatele o i latou sa molimauina lea po, ao saunoa le afioga i le Palemia o Samoa i lana saunoaga, na mai nisi ua fai si umi o le lauga, ae peitai ane na toe liua ia lagona ina ua faaiu le lauga a le Palemia ae susu’e ane lana itulau pese ma ia faafiafia ai loa le mamalu o le atunuu.

Tatalaina o le CD Fou a le Punialavaa
Tatalaina o le CD Fou a le Punialavaa

O le pese a le susuga ia Tuilaepa Aiono Sailele Malielegaoi na ia saunoa, e le faatusalia o latou leo ma le tulaga maualuga ua iai siufofoga o le aufaipese a le Punialavaa. E tasi lava le pese na te iloaina na o le pese na sue ai le loomatua o le aiga o lona faletua lea, o le latou pese foi e le taua le pa’ulua o latou leo, ae taua le faailoa ai o le agaga o le fiafia. E toatolu le aufaipese a le afioga i le Palemia sa faafiafia i lea po ma o i latou uma nei sa malaga mai i Samoa. E leo malie le faasolo tamailima a le Palemia i lana ukulele ma lona siufofoga malu i le pese “Sa ou savali i le ala”

O le toatele o tama ma tina matutua sa molimauina siufofoga malie o le Palemia ma lana ukulele, o le taimi muamua lea faatoa latou maimoaina ai le palemia o Samoa o pese ini faafiafiaga faapenei, aemaise ai o le taimi muamua foi lea ua pese ai le palemia i totonu o Niu Sila ini tuufaatasiga a Samoa.

O le sao o le afioga i le palemia i le faamanatuina o le lima sefulu tausaga o le Punialavaa, o se faaaloalo maualuga i mea tau musika ua matagofie ai le po. Ua faailoa le agaga fiafia ma le loto faafetai o le susuga i le faafeagaiga ia Rev Lale Peteru ma le faletua Vini i le patipati ma le laufofoga fiafia i le matagofie o le faafiafiaga a le afioga i le Palemia. Ma ua avea foi o se luitau mo i latou o loo iai le taleni pese ae ua faatalale ma le toe faufauina le oa o le gagana o musika.

O le faafetai a nisi o le atunuu i lea afiafi aemaise lava i nai tuaa matutua sa auai, i le aufaipese a le Punialavaa, ona o le valaaulia sa aumai ai le Palemia o Samoa ua mafai ai ona latou faalogologo ma vaavaai i taleni o loo nofo ma le palemia o Samoa.

O le loto fafetai ma le agaga faatauvaa o le susuga i le faafeagaiga ia Lale Peteru ma le aufaipese a le Punialavaa, ona o le masii mai o le fala siigata i le afioga i le Palemia o Samoa e molimauina le iupeli auro o le tautua pese a le Punialavaa, ua le gata i ana saunoaga faamalo, faamalosi ma le faaleiau mo le Punialavaa ae ua lagiina foi lana pese e faailoa ai lona loto fiafia.