Ua faamaonia le Pine Siliva a Ele Opeloge mo Samoa, mai le Olimipeka ole 2008 i Saina. Ole saunoaga lea a Tuaopepe Jerry Wallwork ile vaiaso na tea nei.
“Ua lē o toe fesiligia lea mea ole a faaapaleina Ele ile Pine Siliva. Ole Pine muamua foi lea a Samoa ile Olimipeka.”
Oloo malaga atu ai le taitai ole Siisii Mea Mamafa a Samoa, Samoa Weightlifting, ile aumaia lea ole Pine a Ele i Samoa. “Manaia tele lenei lagona ma ua ou matuā fiafia tele mo Ele.”
Ua leva ona faatali le faamaoniga o lenei manuia mo Ele aemaise le atunuu e ui oloo fesiligia foi ele Samoa Weightlifting le umi o suesuega sa faia o lenei mataupu.
Ile faaiuga ole taamilosaga 75 kilokalama i Saina, na tu fā ai Ele ae na ole tasi le kilokalama na va ai o ia male tu tolu. O lana sii 269 kilokalama, ae 270 lē na tu tolu o Mariya Grabovetskaya o Kazakhistan. Ua faamaonia la le faaaogāina ele vaega lea na tu lua male tolu o fualaau faasāina, ma maua ai le faaiuga ale IOC, ole a see atu Ele ile tu lua, ae tu tolu Maryam Usman o Nigeria.
Faaiuga ina ua mae‘a le Olympics i Saina
Pine Auro – Miran Jang (KOREA) Aofai 326 kilokalama
Pine Siliva – Olha Korobka (UKRAINE) Aofai 277 kilokalama
Pine Apamemea – Mariya Grabovetskaya (KAZAKHISTAN) Aofai 270 kilokalama
Tu 4. – Ele Opeloge (SAMOA) Aofai 269 kilokalama
Tu 5. – Maryam Usman (NIGERIA) Aofai 265 kilokalama
Faatulagaina o pine ua iai nei.
Pine Auro – Miran Jang (KOREA) Aofai 326 kilokalama
Pine Siliva – Ele Opeloge (SAMOA) Aofai 269 kilokalama
Pine Apamemea- Maryam Usman (NIGERIA) Aofai 265 kilokalama kilokalama
