O le taeao o le Aso Toonai na se‘iina ai le lulu a le Asosi a Tama Tuai o Sanele i luga o le leitio a le Penina o Asuisui 1197am.
O le faanaunauga o le Asosi a Tama Tuai o Sanele (COSA) Channel Old students Association ina ia aloaia ma faafofoga le atunuu i le viliina ma le se‘iina o numera a o molimauina e le afioga ia Laulu Site Ah See le latou faamoemoe.
O le ‘auga o ‘aute, o le sailiga seleni ona o le fia fesoasoani atu i alo ma tamafanau o loo a‘otauaina i le aoga sa fofoa mai ai lo latou soifua aoaoina aemaise le fia faaleleia o faleaoga i Moamoa. E ui ina aumau i nei atunuu ae susue lava le faamalama ma tepa atu e fia soosoo tau‘au i le taugata o le soifuaga ua iai nei vaitaimi. O i latou nei sa faamanuiaina i nisi o pepa malaga fua mo Samoa ma seleni tupe.
(1) Kimo Thetadig. (2) Anitelea Aniseto. (3) Rosita Tavui.
O le Komiti a le COSA i Kuiniselani e aofia ai le Peresetene o Fonomua Jake Pale; o le Sui Peresetene o William McFall; o le Teutupe o Misi Soonalote; ma le Failautusi o Muliaga Kelly Chong Nee.
