O moomooga fiafia o mātua o se tama poo se teine e usitai ma faalogo, e faia lava soo se mea e manao ai. O le aso faaiu o le masina o Aperila na faamanatuina ai le 21 tausaga o le tamaitai o Filipina Theresa Auvaa.
O le afioga ia Lemalu Gago Agaseata Neemia Auvaa e mai alalafaga o Vavau, Nofoalii ma Falealupo, a o le tinā ia Julietta Auvaa (Faala Palauli & Taufusi) o tuaa ia o le tamaitai o Filipina.
Sa taitaia le sauniga o le faamanuiaga e le susuga ia Auvae Tamala. O le tatalo amata sa fofogaina e le taitai o le Aiga Samoa i Logan, susuga ia Kaleta Hakula. Sa fai ma Fofoga o le aso le afioga ia Lealaitagomoa Lealofi Lausei Pritchard.
O se aso fiafia i le soifuaga o Filipina ona sa mafai ona feiloai atu ai i ona aiga ma uo ua leva e lē o mafuta. Sa faaiuina le mafutaga i le tatalo na saunia e le susuga i le faafeagaiga ia Ps Kerisimasi Hytonue ma taape le auvalaaulia ma le agaga fiafia ua to‘a le moa aemaise o faaaloaloga sa lei alo tamala i ai mātua faapea le aiga ona o pelega o fanau.
Manuia lou 21 tausaga Filipina Theresa Auvaa!
