E iai le fuaitau e masani ai le toatele ma misi alofa ai pe a oo ni talanoaga ma ta‘ua ai tuaa matutua. O lea fuaitau e masani ona faalogoina pe a mapu se talanoaga poo ni tala faamama‘i e uiga i mātua, ona faapea lea o le isi tagata: “Amuia oe o lena e soifua mai si ou tamā” ia pe faapea foi, “Amuia oe o lena e soifua mai si ou tina”. E mafua ona fai le upu amuia oe, ona e ese ma le tiga o le alofa fia tausi matua ae ua leai se isi e faatino i ai lea tausiga.
I se isi foi itu, e mafua ona ta‘ua le upu amuia, auā foi poo le ā lava le tele o tiga ma fita, o faigata ma faafitauli o le olaga, ae a vaai atu lava i foliga o le tina o loo saofai mai, e pei lava e fofoe atu ia mau lē mautonu o le soifuaga. E leitioa a faalupe tina o le ola o le aiga. E lē gata o ia o le tausi tagata, ae o le tausimea foi e malu ai le tamā ma le fanau. O le mafanafana o ona suasusu e puaina mai ai le ola auā le fafagaina o le oloa tāua. Ae a oo ina matutua fanau, o le tuualalo ma le moli talosaga a le tina, o si ona leo lemu e fautuaina ai le alofaiva i tiute ma galuega, ua lava lea e tali ai le Atua ma toina manuia auā atina‘e ma moemitiga i vaega e manuia ai aiga.
O le ala lea o le maligi o loimata o le fanau a le tina o Talaileva Tuimalatu Lolua Brown a o faia le sauniga lotu e faamanatu ai le 81 o tausaga o lona soifua.
O lagona o le alofa na lofia ai le fanau auā a vaavaai atu i foliga o si o latou tina, ona lagona lea o le ootia pe a toe manatu i le tele o tausaga sa tausi mai ai i latou i alofilima mafanafana o nai o latou mātua, aemaise ai lava o si o latou tina. E tele fita sa ui mai ai le folauga a o iai i Samoa seia oo ina malaga mai nisi o le fanau i Niu Sila ma nonofo ai, ma seia oo lava ina malaga atu i Ausetalia ma nonofo mau ai loa.
Sa lagona le agaga faafetai o le fanau i le Atua ona o Lana tausiga alofa i si o latou tina, ma e ui lava ina ua fai i lagi le folauga a le tamā o le aiga i le tausaga ua tuanai atu, ae o le mea sili o loo tumau le māfana o le mafutaga ma si o latou tina.
O le tina ia Talaileva Tuimalatu Lolua Brown e mai le alalafaga o Savaia i Lefaga ma le afioaga o Lona i Fagaloa. O loo iai nei o ia i si ana fanau i Melepone i Ausetalia, ma sa ia lagona foi le agaga faafetai i si ana fanau ma ona aiga ona o le faailogaina o lona 81 tausaga, ae sili ai le viiga i le Atua ona o ana faamanuiaga mo ia.
