“O le molimau a le Tusi Paia, o aso o lou olaga e matuā puupuu ma saasaa, ma ua faatonuina foi i tatou e ao ona faitauina aso e te ola ma soifua ai i luga o lenei fogaeleele”. O nisi ia o upu na saunoa i ai le taitai o le sauniga le Susuga a Pastor Isaia Lameta, i le faamanatuina o le 21 tausaga o le tamaitai o Gloria Raewynn Leota.
Na matuā faatumulia le malumalu o le ekalesia Peace Chapel i Magele i le afiafi ole Aso Toonai na tuanai atu nei i aiga, uo ma aumea mamae a le tamaitai o Gloria sa molimauina le faamanatuina o lona aso soifua.
Na matagofie mea uma i lea afiafi aemaise ai o le molimauina o se tasi foi o suiga na saunoa i ai lona tuaa ia Peter Leota, a o ofoina atu se asoa auro i si ona afafine e sui tulaga i le ki e pei ona masani ai le atunuu i aso faapenei.
Na faaalia manino e Peter, e leai se aogā e avatu ai le ki ona tautau lea i le fale, ae sili ona tuuina atu le asoa e fai ma faailoga ia te oe, o le alofa ma le faamaoni o le Atua i le tele o fita ma faigata na e ui mai ai seia oo ina e aulia nei tausaga e 21. “Poo fea lava e te alu i ai, ia faamanatu atu pea e lenei asoa ia te oe, e lelei, e lelei, e lelei le Atua.”
O le tamaitai ia Gloria o le alo lona fa o le Susuga Peter ma le faletua ia Vaonila Leota, ma o loo a‘oa‘oina nei i le Iunivesite o Waikato. O se afiafi fiafia ma le matagofie i ona itu uma, aemaise ai lava foi le faamalieina o le auvalaaulia i le taumafataga auā e peiseai o le itu sili foi lea ona tāua i aso faapenei.
