O lenei Ekalesia sa faavaeina ma faatūina mai i Samoa i le masina o Tesema i lona aso 2, i le tausaga na se‘i mavae atu nei 2012, i le afioaga o Vaitele fou. O lea sa latou faamanatuina ai le uluai tausaga talu ona faatūina mai lenei Ekaleia tapuai saoloto i le Atua ma lona finagalo.
Na molimauina mai ai e se tasi o uo faamoemoeina sa iai i le fia molimauina o lenei sauniga, sa vaaia le toatele o nisi e lē auai i lenei lotu ae sa matuā faatumulia le nofoaga sa faatino ai lo latou faamoemoe.
Sa molimauina foi e le toatele nisi sa o latou amataina ma faavaeina lenei Ekalesia, ae ua molimauina ua 13 nei matāfale malolosi ua iai, ae lē o faitauina ai nisi o matāfale fesoasoani.
Sa faapea foi ona lē alo tamala i ai se tasi o a latou lala fou ua faavaeina ma ua faatūina nei i Aukilani Niu Sila, lea ua lua ai nei Ekalesia Metotisi Fou mo le Atua. Sa o latou faatāuaina foi lea aso faapitoa o le Ekaleia aoao.
O se sauniga tumu ma toatele uso asiasi sa auai o uo ma paaga a sui o le Ekalesia lenei. O nisi sa molimauina poo ē sa lolotu ai foi o nisi foi mai i le Ekalesia Metotisi Samoa, ma ua faaulufale ai foi nisi aiga se toafā ma ua 28 ai nei aiga o lenei Ekalesia tapuai Saoloto i Niu Sila, ae faatoa ono masina talu ona faatūina lenei uluai Ekalesia Tapuai Saoloto, ae sa amataina i le na o le 5 aiga. I lenei numera e pei ona saunoa i ai le fofoga o le Ekalesia le afioga ia Faumui Salafa.
O le susuga i le taitai le faafeagaiga ia Mafua Kolose, sa o laua galulue faatasi ma le susuga i le faafeagaiga ia Fatu Manu. O le matua na maua mai i le Perofeta o Iosua e faapea “Ia outou taitasi ma sii a‘e se maa i lona ua. Pe a fesili mai a outou fanau i se aso, e faapea mai, Pe se a ea le uiga o na maa ia te outou?”
I le faalauteleina o le manatu o le taitai le susuga ia Mafua Kolose, o maa nei e faapea sa avatu e le nuu o le Atua, ina ua mavae Mose ae faaauau e Iosua le valaauga a le Atua ina ia avatu lona nuu o Isaraelu mai le mea sa pologa ai i Aikupito. O maa ia sa faamanatu ai la vaitaimi o lo latou pologa ia Farao ma lona malo. Peitai i le vaitaimi lenei ua faatusa e le taitai ia maa i lou loto ia mamā ma ia lelei, ona tele lea o manuia. Aua e te fiu e tapuai i le Atua i lou loto vale ma le lē lelei, e uma au mea ona ave i le lotu ma le faifeau lena e te lotu ai, ae lē maua ai se viiga o le Atua. Ae a e tapuai ma lou loto e lelei ma le tapuai saoloto, e liligi mai faamanuiaga mo oe ma lau fanau, aemaise foi, o loto na o loo manaomia i le taimi lenei o lou faatalitali atu i le Afio mai o le PEPE o le Kerisimasi.
Na faaiu le sauniga i le iputi sa tapenaina e nai tina o le Ekalesia ae o le afioga ia Lemalu Masinamua o se tasi o tamā matua o le Ekalesia sa feulaina le keke o le uluai tausaga o le ‘Ekalesia Metotisi Fou a le Atua’ i Samoa ma atunuu e mamao. Ae ua molimauina mai foi o le aso 22 o le masina lava lenei o le a tatala aloaia ai le isi a latou lala fou i Manurewa, sosoo lea ma le isi foi lala fou i Ausetalia. Ae o lea foi toeitiiti mautu mai le isi a latou lala i West Auckland o loo tapenaina foi e nisi o toa ma le alolofa mo‘i i le faasinomaga a le Alii.
O nei tapenaga uma ua uma ona faafesootai atu i le afioga i le taitai aoao o le Ekalesia ma lona fesoasoani le susuga ia Petaia Setu ma le susuga ia Simeti Tupai o loo galulue lava laua i Samoa.
