O se vaaiga ma se maimoaga matagofie le faatasitasi o tupulaga talavou mai Ekalesia eseese o le Tovine Paia, ae sii faatasi le faaneetaga i le Atua, ae atili ona faagaeetia finagalo pe a vaaia alo ma fanau o maligi loimata a o vivii ma sii le faamanū i lo latou Atua agaalofa. O le taimi lea e mafai ai ona faapea ifo, e faamaoni le taulaga o viiga o loo ofo atu, o le agaga lea na maitauina i le afiafi o le Aso Toonai na tuanai atu, a o aofaga potopoto tamafanau a Samoa mai Ekalesia eseese o le Tovine Paia, e lagolago le faamoemoe o le Autalavou a le Hume AOG i le pitonuu o Thomastown.
Atonu o loimata o le olioli, loimata o le salamō faamaoni, ma loimata o le faafetai. E tele autalavou mai ekalesia eseese na faaalia lo latou lagolago ia latou aitema matagofie, lea na faatasi ai ma le autalavou a le Ekalesia a uso mai Toga, o lo latou faafeagaiga na tulai mo le upu folafola e faalaeiau ai alo ma fanau, le susuga ia Salesi.
O le susuga i le faafeagaiga taulagi ia Enele ma le faletua ia Mesepa Tailiki o mātua ia o le autalavou a Hume, ae na mamalu naua le afiafi i le auai atu o nisi o le aufaigaluega paia, susuga ia Chiko ma le faletua ia Toa‘i, susuga ia Toso, ma le susuga ia Lui, atoa ai ma le tapuaiga a le sui o la tatou pepa.
O le manatu autu o le po, “Po ua e Saoloto” o se fesili e tofu lagona i ai, ae i le agaga faaali o alo ma fanau, na iloa gofie ai ua saoloto ona o le togiola na saunia e Keriso Iesu, ma e lē faapitoaugafa mo se ekalesia ma se talitonuga, ae mo tagata uma, ma ekalesia eseese uma.
O le viiga sili i le Mesia, ona o po ia e tele ina lē maua ai fanau i aiga ona o fiafiaga, ae silia ma le tolu selau alo ma fanau na uulima faatasi i lea afiafi, ma alagaina le saolotoga ua taulimaina, ona o le fatu na luluina e mātua ma le aufailotu, faafetaia ai le tofa mamao a le susuga i le faafeagaiga ma taitai o le autalavou a Hume, ona o le lagalaga i mea e lelei ai fanau a Samoa.
