O le Aso Sa talu ai na faamanatuina ai le limasefulu tausaga o Rev Namusua Mareko o se tasi o auauna a le Atua ua iloga foi i le galuega i Sini nei. O le susuga i le faafeagaiga ma lona faletua ia Ataataoletaeao Mareko na amata galulue i le EFKS i Camden i Sini nei mai le tausaga e 1999. Sa amata mai le aotauina o le susuga i le Faifeau mai Malua i le 1994 ae faauuina i le 1997.
O le siitia mai i Ausetalia na faatūina ai loa le aulotu o loo iai nei i Camden i matafale e valu (8) ma ua uluolaola ma atoa nei le luasefulutasi o aiga ma matafale o loo ositaulaga ai nei. Na mae‘a le sauniga i le Aso Sa ma faateia ai loa e le faletua le paia ma le mamalu o le Ekalesia ina ua valaaulia faafuasei i latou e afifio atu mo se taumafataga faatasi e faamanatuina ai le limasefulu tausaga o le tamā o le galuega.
Na faateia le valaaulia i le taunuu atu i le Community Hall a Minto i se taumafataga matagofie ma le felanulanuai na tapenaina lava e le faletua ma le Polynesian Umu Cooker i faatonutonuga ma teuteuga a le alii faipese ia Robert O’brien. I le tuanai ai o le lauga matagofie a le susuga i le Faifeau na tali le sua ma faamanuia le keke o le aso fanau i taumafataga eseese e pei o le umu luau ma le palusami, manufata ma le oka aemaise kuka manogi anoanoai e masani ai aiga Samoa i toonai.
O le agaga lea o le faia faapea e le Faifeau ma le faletua o lenei taimi faapitoa ia mafuta fiafia ai lana ekalesia faatasi ma ia i lona aso faapitoa.
O afioaga o le susuga ia Rev Namusua Mareko o Lalomalava ma Tanugamanono ae o le faletua ia Ataataoletaeao o Tuanai ma Moataa ma e toalima o la alo tolu tama toalua teine. O le tausaga e 2004-2010 na galue ai o ia i tofiga a le Ekalesia o le failautusi a le pulega a Sini i Saute.
Sa faapea foi na avea ma faatonu o tupulaga ma taaloga o le Pulega lea na iloga ai foi le malosi o polokalame faasaga i le atinaeina o le gagana ma agaifanua i autalavou faapea le faaaogāina o taaloga e atiae ai le olaga finafinau ma mamao ese ai fanau ma itu faaletonu o le soifuaga.
“O le taiala sili lava lenei i fanau ma tupulaga Samoa o loo soifua i atunuu mamao e aofia ai Ausetalia nei, o le Tusi Paia e faamanatu ai pea le gagana tautala ma le faitau, o tala o le Tusi Paia e fai ai le faamasinoga a le fanau i mea lelei ma itu faaletonu o le soifuaga o loo iai nei.
O se tasi o lesona tāua o le Tusi Paia o le ava lea o fanau i mātua faapea foi le faapalepale o mātua ia latou fanau.” E lē uma aogā o Afioga Paia a le Atua. Ia Manuia tele le Aso fanau i lau Susuga Rev Namusua Mareko.
