Faamanatu le uluai taunuu o le Faatuatuaga Baha‘i i Samoa

Na faatumulia se tasi o nofoaga matagofie i le Gold Coast i le toatele o uso ma uo o le Pasefika o loo tapuai i le Faatuatuaga Baha‘i, a o auai mai i le faamanatuina o le 60 tausaga talu ona taunuu le Faatuatuaga Baha‘i i Samoa. Na faataunuu lenei faamoemoe i le aso 18 o Ianuari.
O se aso tāua tele lenei mo le Faatuatuaga aemaise sa auai faatasi ma le tamaitai Ausetalia, le faletua ia Mrs Lilian Ala‘i, o lē na ia uluai momoli atu le Faatuatuaga Baha‘i i Samoa i le aso 14 o Ianuari i le 1954.
O le faletua Lilian sa taunuu atu i Samoa ae faatoa 21 ona tausaga, ma amata ai loa lana galuega o le faalauiloaina o le Faatuatuaga i nisi sa latou feiloai ma mafuta, ma o le uluai Samoa lava lea na ia talia le Faatuatuaga, o le susuga ia Sailala Tamasese ma lona aiga i Papauta.
O le tamaitai o Lilian sa faaipoipo i Samoa ma se alii Peresia na taunuu atu i Samoa o Soheil Ala‘i, e toatolu o la alo. Ua toe taliu mai nei i Ausetalia ona o le manatu o le fanau, ua matua lona soifua e pei ona maliu ai lona alii i Samoa.
O se aso matagofie ma le fiafia aemaise o le faafetai i le Atua ua maua lenei avanoa maua gatā, e mafai ai ona feiloai ma le Tina o Lilian ma talatalanoa i lona uluai taunuu atu i Samoa i le vaa o le Matua, ma le amataga o lana galuega.
Sa ia ta‘ua foi ni faafatiatama‘i sa faafeagai i le taunuu atu ma se tapuaiga fou i totonu o Samoa, o se atunuu ua malosi tele ai Lotu Kerisiano, peitai sa lē faavaivai ai, i lona talitonuga, e tasi lava le Atua o loo tapuai uma i ai, ma o le anavatau lava a le Faatuatuaga, ia soifua fealofani ma fegalegalea‘i tagata uma auā e tasi lava tatou i luma o le silafaga a le Atua.
Sa faaiu i se taumafataga tele ma ta‘ape ai le fuamanusina, foi pea le viiga i le Atua.